Nobel fondi Rossiya va Eron elchilariga yuborilgan taklifnomalarni qaytib oldi

Nobel fondi bir yillik tanaffusdan so‘ng Rossiya, Belarus va Eron elchilarini Stokholmdagi Nobel mukofotini topshirish marosimiga taklif qilgandi.

Foto: Nobel fondi

Fondning bu xatti-harakati tanqidlarga sabab bo‘lgach, bu uch davlat elchilariga yuborilgan taklifnomalar qaytib olingan. Nobel fondi taklifnomalar qaytib olinganini aynan tanqidlar bilan bog‘lagan. Rossiya, Eron va Belarus elchilari banketga taklif qilingani Shvetsiyadagi uchta yirik partiya yetakchilari tanqidiga uchradi. Ular bu elchilar qatnashadigan banketga boykot qilishlarini aytgan.

Shuningdek, Shvetsiya qirollik oilasi ham bu uch davlat elchilari yuqori darajali marosimga taklif qilinganidan hayronligini bildirgan. Shvetsiya qiroli Rossiya, Eron va Belarus elchilari ishtirok etadigan tadbirda qatnashishi aniq emasligi aytilgan.

O‘tgan yili Nobel fondi Rossiya va Belarus elchilari bu ikki davlatning Ukrainaga qarshi agressiyasi sabab tadbirga taklif etilmasligini ma’lum qilgandi. Rossiyaga faol qurol yetkazib berayotgan Eron elchisi ham o‘tgan yilgi marosimga chaqirilmagan.