Varshava Kiyevga faqat eski shartnomalar asosida qurol yetkazib beryapti

Polsha endi Ukrainani qurol bilan ta’minlamaydi, deya ma’lum qildi Varshava hukumati. Bosh vazir o‘rinbosari Yatsek Sasin 21 sentabr, payshanba kuni Plus radiostansiyasiga tegishli savolga javob berar ekan, hammasi bosh vazir Mateush Moravetskiy aytganidek sodir bo‘layotganini aytdi. «Biz bu kelajak uchun nimani anglatishini ko‘ramiz», deya qo‘shimcha qildi siyosatchi. 

Mavzuni davom ettirgan Polsha hukumati vakili Petr Myuller PAP davlat axborot agentligiga Polsha faqat oldindan kelishilgan o‘q-dori va qurol-yarog‘ yetkazib berishni, shu jumladan Ukraina bilan imzolangan shartnomalar doirasida amalga oshirayotganini aytdi.

Moravetskiyning munozarali bayonotlari 

Kecha Polsha hukumati rahbari Polsat News yetakchi axborot kanalining Polsha Ukraina g‘allasini olib kirishni taqiqlaganiga qaramay, Ukrainani qurol-yarog‘ va humanitar yordam yetkazib berishda qo‘llab-quvvatlashda davom etadimi, degan savoliga shunday javob berdi: «Biz endi Ukrainaga qurol yetkazib bermayapmiz, chunki o‘zimizni eng zamonaviy qurollar bilan ta’minlaymiz». Uning so‘zlariga ko‘ra, Polsha qurol-aslaha buyurtmalarini sezilarli darajada oshirgan. «Agar siz o‘zingizni himoya qilmoqchi bo‘lsangiz, himoya qiladigan narsangiz bo‘lishi kerak - bu biz e’tirof etadigan qoidadir», dedi Moravetskiy va Polsha Yevropadagi eng kuchli quruqlikdagi armiyalardan biriga ega bo‘lishi uchun mamlakat qurolli kuchlarini modernizatsiyasi kerakligini qo‘shimcha qildi.

Shu bilan birga, intervyuning yana bir nuqtasida Moravetskiy Varshavadagi hukumat hech qanday holatda Ukrainani xavf ostiga qo‘ymasligini ta’kidladi. «Bizning Jyeshuvdagi markazimiz amerikaliklar va NATO bilan kelishilgan holda, kelajakda ham hozirgidek rol o‘ynaydi», deb ishontirdi u. G‘arbning aksariyat harbiy yordami Ukrainaga Rossiyaga qarshi mudofaa kurashida Polsha janubi-sharqidagi Jyeshuv orqali keladi. 

Dpa agentligi ta’kidlaganidek, PAP axborot agentligining Polsha xizmati Moravetskiy bayonotlarini ingliz tilidagi xizmatdan boshqacha talqin qilgan. Polsha versiyasida hukumat rahbarining bayonoti qurol yetkazib berishni to‘liq to‘xtatish to‘g‘risida aniq xulosa chiqarish mumkin bo‘lgan tarzda yetkazilmagan. 

Ukrainadan g‘alla importi bilan bog‘liq kelishmovchiliklar 

Varshavadan munozarali bayonotlar Ukraina va Polsha o‘rtasida Ukraina g‘allasini import qilish bo‘yicha davom etayotgan mojaro fonida yangragan. Polsha, Vengriya va Slovakiya, Yevropa Ittifoqi qaroriga zid ravishda, o‘z dehqonlari manfaatlarini himoya qilish istagini bildirgan holda, Ukrainadan g‘alla va boshqa bir qator qishloq xo‘jaligi mahsulotlarini import qilish bo‘yicha milliy embargoni uzaytirish haqida e’lon qildi. Bu qarordan g‘azablangan Kiyev JSTga shikoyat qildi. Shu bilan birga, Varshavaning ta’kidlashicha, taqiq faqat Ukrainadan Polsha bozoriga g‘alla importiga taalluqlidir, uning mamlakat hududi orqali xalqaro bozorlarga «birdamlik koridorlari» orqali olib o‘tilishi bunga tegishli emas.