Slovakiyada saylovlar: favoritlar orasida - Kiyevga yordam ko‘rsatishga qarshi partiya

Slovakiyada 30 sentabr, shanba kuni bo‘lib o‘tayotgan navbatdan tashqari parlament saylovlari natijalari ushbu NATO davlatining tashqi siyosati, shuningdek, Ukrainaga o‘zini himoya qiladigan yordam miqdori uchun hal qiluvchi bo‘lishi mumkin. Slovakiya parlamentidagi o‘rinlar uchun 25 ta siyosiy partiya kurashmoqda. Biroq, so‘nggi so‘rovlarga ko‘ra, saylov uchastkalarida asosiy kurash rossiyaparast sobiq bosh vazir Robert Fitsoning populistik «Yo‘nalish – sotsial-demokratiya» partiyasi va Yevropa parlamenti raisi o‘rinbosari Mixal Simekning «Progressiv Slovakiya» yevropaparast liberal partiyasi o‘rtasida bo‘ladi.

Taxminlarga ko‘ra, har ikki partiya taxminan 20 foiz ovoz oladi va shuning uchun ularning hech biri mutlaq ko‘pchilikka tayana olmay, koalitsiya bo‘yicha sheriklarni qidirishga majbur bo‘ladi. Bunday sherik bo‘lishning eng katta imkoniyati Slovakiya sobiq bosh vaziri Peter Pellegrinining 13,7 foiz ovoz olishi mumkin bo‘lgan «Ovoz» partiyasidir. «Oddiy xalq va oddiy fuqarolar» partiyasi ham e’tiborni tortadi, uni saylovchilarning 8,2 foizi qo‘llab-quvvatlashi mumkin.

Robert Fitsoning Ukrainaga qarshi siyosati

Bungacha Slovakiya hukumatini boshqargan Robert Fitso 2018 yilda yosh tadqiqotchi jurnalist Yan Kutsiakning o‘ldirilishi ortidan korrupsiyaga oid ayblovlar tufayli bosh vazir lavozimini tark etishga majbur bo‘lgan edi. Kuzatuvchilar fikricha, uning hokimiyatga qaytishi Bratislavaning g‘arbparast yo‘nalishdan voz kechishini anglatadi. Xususan, Fitsoning saylovoldi va’dalaridan biri - Ukrainaga harbiy yordamni qisqartirish. Der Tagesspiegel gazetasi ta’kidlaganidek, o‘ng qanot populistlar ukrainaliklarni o‘z mamlakatdagi iqtisodiy muammolar va beqaror siyosiy vaziyatga sababchi deb biladi. 

Biroq, ko‘plab siyosiy sharhlovchilar ta’kidlashicha, saylovchilarning uchdan bir qismi hali bir qarorga kelmagan va uni faqat saylov kuni qabul qilishi ehtimoli katta.

Slovakiyada parlament saylovlari uchun birinchi ekzitpollar xuddi shu kuni mahalliy vaqt bilan 20:00 dan keyin (Toshkent vaqti bilan 23:00) kutilmoqda.