OAVni ro‘yxatdan o‘tkazish bo‘yicha davlat xizmati ko‘rsatish muddati qisqaradi

Qonunchilik palatasidagi O‘zbekiston Xalq demokratik partiyasi fraksiyasining navbatdagi yig‘ilishi bo‘lib o‘tdi. Unda “Davlat xizmatlari ko‘rsatish tizimi takomillashtirilgani munosabati bilan ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi ko‘rib chiqildi.

Qayd etilganidek, davlat xizmatlari markazlari tomonidan xizmatlarning qamrab olish darajasi pastligi, davlat xizmatlarini ko‘rsatish muddatlarining uzunligi, ular bo‘yicha to‘lovlarning yuqoriligi, aksariyat davlat organlarining zarur ma’lumotlari to‘liq raqamlashtirilmagani dolzarb bo‘lib qolmoqda.

Qonun loyihasi bilan ayrim qonun hujjatlariga o‘zgartish va qo‘shimchalar kiritish nazarda tutilmoqda. 13 ta qonunga faktlarni tasdiqlovchi ma’lumotlar va hujjatlarni talab qilmaslik bo‘yicha tegishli o‘zgartish va qo‘shimchalar kiritilayotgan bo‘lsa, 2 ta qonun bilan ayrim davlat xizmatlarini ko‘rsatish muddatlari qisqartirilmoqda. Masalan, Ommaviy axborot vositasini ro‘yxatdan o‘tkazish muddatini 15 kundan 10 kunga qisqartirish belgilanmoqda.

Deputatlar ta’kidlanganidek, qonun loyihasi davlat xizmatlarini sifatli ko‘rsatilishini ta’minlashga, turli toifadagi davlat xizmatlari ko‘rsatish tizimini raqamlashtirish jarayonlarini jadallashtirishga xizmat qiladi. Qonun loyihasini takomillashtirish yuzasidan fikr-mulohazalar almashilgach, taklif va tavsiyalar bilan qonun loyihasi qo‘llab-quvvatlandi.