«Gazprom neft» O‘zbekiston bilan quduqlarni burg‘ilash bo‘yicha kelishuvga erishdi 

Rossiyaning «Gazprom neft» kompaniyasi O‘zbekiston konlarida quduqlarni burg‘ilash jarayonlarini optimallashtirishga yordam beradi. «Rossiya energetika haftaligi» forumi doirasida kompaniya «O‘zbekneftgaz» AJ bilan tegishli shartnoma imzoladi.

«Gazprom neft» bilan hamkorlik «O‘zbekneftgaz»ga quduqlarni burg‘ilash vaqtini 20 foizdan ko‘proq qisqartirish imkonini berishi kutilmoqda. 

Shartnomada «O‘zbekneftgaz» konlarida quduqlarni qurish va ulardan foydalanish uchun «Gazpromneft-Noyabrskneftegaz» loyihasi operatori tomonidan muhandislik yondashuvlari va yechimlari kompleksi ishlab chiqilishi belgilab qo‘yilgan. Bu burg‘ilashning texnologik nazorati, burg‘ilash uskunalari auditi, shuningdek, quduqlar dizaynini o‘zgartirish va burg‘ilash suyuqliklarining optimal formulasini tanlash bo‘yicha tavsiyalar ishlab chiqishni o‘z ichiga oladi. 

«Gazpromneft-Noyabrskneftegaz» - «Gazprom neft» kompaniyasining sho‘’ba korxonasi. Kompaniya Yamalo-Nenets va Xanti-Mansi avtonom okrugidagi 37 ta konda neft va gaz qazib oladi.