Isroil G‘azo sektoriga hujumlarini kuchaytirdi

Isroil armiyasi (TsAHAL) BMT yirik agentliklarining o‘t ochishni to‘xtatish to‘g‘risidagi chaqiriqlariga qaramay, G‘azo sektoridagi Falastinning HAMAS guruhi nishonlariga hujumlarini kuchaytirdi. «Biz HAMASga zarba beramiz va rejamiz bo‘yicha bir istehkomdan ikkinchi istehkomga o‘tmoqdamiz, HAMASni muntazam ravishda harbiy salohiyatidan mahrum qilmoqdamiz», dedi Isroil armiyasi matbuot kotibi Jonatan Konrikus Amerikaning CNN telekompaniyasiga yakshanba, 5 noyabr kuni kechqurun bergan intervyusida.

«Biz quruqlikdagi kuchlarni - piyodalar, tanklar, harbiy texnikani jalb qildik. Havodan ham zarba beryapmiz va o‘q uzyapmiz», - dedi Konrikus. U Isroil harbiylarining asosiy e’tibori yerosti tunnellaridagi HAMAS infratuzilmasiga qaratilganini qo‘shimcha qildi.

G‘azo sektorining ikkiga bo‘linishi

Avvalroq Isroil armiyasi G‘azo sektori shimoliy va janubiy qismlarga bo‘linganini e’lon qilgan edi. «Hozir janubiy G‘azo sektori va shimoliy G‘azo sektori mavjud. G‘azo shahri janubiy qirg‘oqdan o‘rab olingan», - dedi TsAHALning yana bir vakili Daniel Xagari. Uning ta’kidlashicha, tinch aholi G‘azo sektorining shimoliy qismidan janubiy qismiga ko‘chib o‘tish imkoniyatiga ega. Shu bilan birga, Xagariga ko‘ra, sektorning shimoliy qismida hali ham 300 mingdan 400 minggacha tinch aholi bor.

Ayni paytda, 5 noyabr kuni G‘azo sektoridan Misrga o‘tadigan yagona chegara punkti ketma-ket ikkinchi kun yopiqligicha qoldi. Isroil bir qator yaralangan falastinliklarni evakuatsiya qilishga rozi bo‘lmagani uchun HAMAS xorijliklarni evakuatsiya qilishni to‘xtatdi. BMTning Gumanitar masalalarni muvofiqlashtirish boshqarmasi nazorat-o‘tkazish punkti yopilganini tasdiqlab, oldingi ikki kun ichida nazorat punkti orqali 1100 dan ortiq odam evakuatsiya qilinganini qo‘shimcha qildi.

Gumanitar sulh tuzishga chaqiriqlar

Birlashgan Millatlar Tashkilotining asosiy agentliklari, jumladan, BMT Bolalar jamg‘armasi (YuNISEF), Jahon oziq-ovqat dasturi va Jahon sog‘liqni saqlash tashkiloti rahbarlari kamdan-kam uchraydigan qo‘shma aksiyada Isroil va HAMAS o‘rtasidagi urushda zudlik bilan o‘t ochishni to‘xtatishga chaqirdi.

«Deyarli bir oydan beri xalqaro hamjamiyat Isroil va bosib olingan Falastin hududlaridagi vaziyatning rivojlanishini kuzatmoqda, halok bo‘lganlar soni ortib borayotganidan g‘azablanmoqda. Bizga zudlik bilan gumanitar sulh kerak. 30 kun o‘tdi. Yetarli, bu darhol to‘xtatilishi shart», - deyiladi bayonotda.

Isroil-Falastin mojarosi

7 oktyabr kuni ertalab HAMASning harbiy qanoti - «Izzaddin al-Qassam brigadalari» Isroilga qarshi «Al-Aqso to‘foni» operatsiyasi boshlanganini e’lon qildi. G‘azo sektoridan Isroil tomon minglab raketalar otildi, qurolli guruhlar Isroil aholi punktlariga kirdi.

HAMASning bildirishicha, operatsiya bosib olingan Sharqiy Quddusdagi Al-Aqso masjidiga bostirib kirish va isroillik muhojirlarning falastinliklarga nisbatan zo‘ravonligi kuchayib borayotganiga javoban amalga oshirilgan. 

Bunga javoban Isroil armiyasi G‘azo sektorida HAMASga qarshi o‘nlab qiruvchi samolyotlardan foydalangan holda «Temir qilichlar» operatsiyasi boshlanganini e’lon qildi. 

Isroil-Falastin mojarosi avj olgandan beri 10 mingga yaqin falastinlik halok bo‘ldi. Isroilda qurbonlar soni 1400 dan oshadi. G‘azoning 2,3 million aholisi Isroilning havodan ommaviy bombardimon qilishi va eksklavning to‘liq blokadasi tufayli oziq-ovqat, suv va dori-darmonlar tanqisligidan aziyat chekmoqda.