Armaniston va AQSh harbiy hamkorlik bo‘yicha kelishib oldi

Armaniston bosh shtab rahbari Edvard Asryan Shtutgartdagi AQShning Yevropa qo‘mondonligi (EUCOM) qarorgohiga tashrif buyurdi. Bu haqda 6 noyabr, dushanba kuni Armaniston Mudofaa vazirligi ma’lum qildi.

General-leytenant Asryan 3 noyabr kuni Shtutgartga tashrifi doirasida EUCOM qo‘mondoni o‘rinbosari Stiven Basham bilan mintaqaviy xavfsizlik va arman-amerika harbiy hamkorligini rivojlantirish, shuningdek, AQShning Armaniston qurolli kuchlarida islohotlar o‘tkazishda ko‘maklashishi masalalarini muhokama qildi. 

Armaniston Mudofaa vazirligi bayonotida aytilishicha, Stiven Basham Qo‘shma Shtatlarning Armaniston Qurolli kuchlariga hozirgi yordamni davom ettirishga, shuningdek, harbiy ta’lim, harbiy tibbiyot, tinchlikni saqlash va jangovar sohalarda hamkorlikning yangi yo‘nalishlarini boshlashga tayyorligini bildirdi.

EUCOM qarorgohidan tashqari, Edvard Asryan Gogenfels shahrida joylashgan AQSh quruqlikdagi qo‘shinlarining Yevropadagi qo‘shma ko‘p millatli o‘quv markazi va Serjantlar tarkibi akademiyasiga ham tashrif buyurdi.