«Chegara bilmas muxbirlar» Rossiyada mustaqil axborot platformasini ishga tushiradi

«Chegara bilmas muxbirlar» xalqaro huquq tashkiloti yaqin haftalarda rossiyaliklarga mustaqil yangiliklardan foydalanish imkonini beruvchi platformani ishga tushiradi. 7 noyabr, seshanba kuni Parijda joylashgan tashkilot sun’iy yo‘ldosh tarmog‘i orqali rus tilidagi servisni ishga tushirish bo‘yicha Eutelsat sun’iy yo‘ldosh operatori bilan shartnoma imzolaganini ma’lum qildi. 

Maqsad - propagandaga qarshi turish 

Maqsad «ko‘proq xilma-xil media-landshaftni targ‘ib qilish», shuningdek, davlat tashviqotiga qarshi turishdir, deyiladi bayonotda. Ta’kidlanishicha, bu rusiyzabon tomoshabinlarga quvg‘indagi Rossiya mustaqil ommaviy axborot vositalari, shuningdek, xalqaro ommaviy axborot vositalarining «keng ko‘lamli yangiliklaridan foydalanish imkoniyatini» beradi. 

«Chegara bilmas muxbirlar» tashkiloti bosh kotibi Kristof Deluar loyihani «tashviqot mantig‘ini o‘zgartirishga qaratilgan ulkan tashabbus» deb atadi. Uning so‘zlariga ko‘ra, mustaqil ommaviy axborot vositalari shu tariqa axborot olish huquqidan mahrum bo‘lgan auditoriyani qamrab oladi va «avtoritar nazorat ostidagi kontent» tarqalishiga qarshi kurasha oladi. 

Ukrainada keng ko‘lamli urush boshlanganidan keyin Rossiyada mustaqil ommaviy axborot vositalari va jurnalistlarni ta’qib etish kuchaydi. Barcha yetakchi mustaqil ommaviy axborot vositalari faoliyatini to‘xtatishga majbur bo‘ldi yoki yopildi. «Chegara bilmas muxbirlar» matbuot erkinligi reytingida Rossiya 180 mamlakat ichida 164-o‘rinni egalladi.