Toshkentda maktab o‘qituvchisi va o‘quvchi o‘rtasida janjal yuz berdi

O‘qituvchi o‘quvchining sochidan tortib darsdan chiqarib yuborgan. Ma’lum qilinishicha, holat poytaxtdagi 103-sonli maktabda sodir bo‘lgan. Vazirlik vaziyatni mas’ullar o‘rganayotganini ma’lum qildi.

Tarmoqlarda poytaxtning 103-maktabda ekanligi aytilgan o‘qituvchi va o‘quvchi o‘rtasida sodir bo‘lgan janjal videosi tarqaldi. Unda o‘qituvchi o‘quvchini tortqilab, darsdan chiqarib yuborishga uringani aks etgan. Bola o‘qituvchisiga qarshilik qilib, uni bir necha marotaba itarib ham yuborgan. Keyin o‘qituvchi bolaga tanbehlar berib, uni siltagan va xonadan chiqarib yuborgan.

Videoda ikki tomonning o‘zaro janjali davomida sinfdagi o‘quvchilar darsda shovqin ko‘tarib baqirgani, qarsaklar chalgani, bolalardan biri «doska» oldiga chiqib, raqsga tushganini ko‘rish mumkin.

Maktabgacha va maktab ta’limi vazirligi matbuot kotibi Dilfuza Sobirovaning ma’lum qilishicha, holat chindan ham 103-maktabda sodir bo‘lgan. Hozirda Toshkent shahar MMTB o‘rganish olib bormoqda. O‘rganish natijalari bo‘yicha qo‘shimcha ma’lumot berilishi ta’kidlandi.

Tayyorlagan: Дилшода Шомирзаева

#janjal #o‘quvchi #o‘qituvchi #maktab