«Xitoy-Qirg‘iziston-O‘zbekiston» temiryo‘li qurilishi oktyabr oyida boshlanishi mumkin

Loyihaning qiymati, dastlabki ma’lumotlarga ko‘ra, 4,7 milliard dollarni tashkil etadi.

Qirg‘iziston prezidenti Sadir Japarov «Xitoy-Qirg‘iziston-O‘zbekiston» temiryo‘li qurilishi shu yilning oktyabr oyida boshlanishini aytdi.

Japarov so‘zlariga ko‘ra, hozir Qirg‘iziston logistika bo‘yicha boshi berk ko‘chaga aylangan, Qozog‘iston va Rossiya temiryo‘llari orqali dunyoga chiqishi kerak.

«Ushbu temir yo‘l qurilsa, dunyoga chiqa olamiz. Bu bizning o‘z yo‘limiz bo‘ladi», dedi Sadir Japarov.

Qayd qilinishicha, Xitoy-Qirg‘iziston-O‘zbekiston temiryo‘lining Qirg‘iziston hududidan o‘tadigan qismi 311 kilometrni tashkil qiladi. U Torugart – Qo‘sh-Dobo – Qozarmon – Jalolobod yo‘nalishi bo‘ylab quriladi. Loyihaning qiymati, dastlabki ma’lumotlarga ko‘ra, 4,7 milliard dollarni tashkil etadi.