Qashqadaryoda “prava”ni imtihonsiz olib berishni va’da qilgan shaxs ushlandi

Toshkent viloyatida yashovchi shaxs o‘zining bank kartasidan 4,5 mln so‘m pul noma’lum shaxs tomonidan firibgarlik yo‘li bilan o‘zlashtirilganligi yuzasidan ichki ishlar organiga murojaat qilgan. Bu haqda IIV Kiberxavfsizlik markazi xabar bermoqda.

Tezkor qidiruv natijasida ushbu harakat Qashqadaryo viloyatida yashovchi B.X. tomonidan sodir etilganligi aniqlangan.

Ma’lum bo‘lishicha, B.X. jabrlanuvchi bilan Telegram messenjeri orqali tanishgan. Unga haydovchilik guvoxnomasini imtixonlarsiz olib berishda yordam berishni aytib uni aldab, oldindan 4,5 mln. so‘m pulini o‘zining bank kartasiga o‘tkazib olgan. Keyin esa o‘rtadagi yozishmalarni o‘chirib yuborgan va jabrlanuvchini qora ro‘yxatga kirgazib qo‘ygan.

Holat yuzasidan B.X.ga nisbatan Jinoyat kodeksining 168-moddasi (firibgarlik) 3-qismi bilan jinoyat ishi qo‘zg‘atilgan.

Avvalroq Toshkentda soxta “prava” sotib kelgan jinoiy guruhga qo‘lga olingandi. Ular 2022 yilning noyabr oyidan 2024 yilning apreliga qadar 200 nafardan ziyod fuqaroni “chuv” tushirgani ma’lum bo‘lgandi.