HAMAS yetakchisi Ismoil Haniyaning dafn marosimi Dohada bo‘lib o‘tadi

1 avgust kuni Tehronda Ismoil Haniya bilan vidolashuv marosimi bo‘lib o‘tadi, 2 avgust kuni esa HAMAS yetakchisining jasadi Qatar poytaxtida dafn etiladi.

Foto: Anadolu Agency

Falastinning HAMAS harakati siyosiy byurosi rahbari Ismoil Haniyaning dafn marosimi Qatar poytaxti Dohada bo‘lib o‘tadi.

HAMAS harakati bayonotida 1 avgust kuni Tehronda Ismoil Haniya bilan vidolashuv marosimi bo‘lib o‘tishi, shundan so‘ng HAMAS yetakchisining jasadi Tehrondan Dohaga yetkazilishini ta’kidladi.

Bayonotda qayd etilganidek, 2 avgust kuni Qatar poytaxtida aholi, Falastin fraksiyalari hamda arab va islom davlatlari vakillari ishtirokida janoza namozi va dafn marosimi bo‘lib o‘tadi.

Tehronda HAMAS yetakchisining o‘ldirilishi

Falastinning HAMAS harakati siyosiy byurosi raisi Ismoil Haniya Eronning yangi saylangan prezidenti Mas’ud Pezeshkiyon inauguratsiya marosimida ishtirok etish uchun Tehronga keldi.

Islom inqilobi muhofizlari korpusi (IIMK) 31 iyul kuni ertalab Eron poytaxtida Ismoil Haniya qarorgohiga zarba berilgani haqida ma’lumot tarqatdi.

Eron va HAMAS Isroilni qotillikni uyushtirganlikda aybladi. Biroq Isroil rasmiylari voqeaga izoh berishdan o‘zini tiyib turibdi.

Ismoil Haniya 2017 yil 6 may kuni HAMAS siyosiy byurosi rahbari etib saylangan edi. U bu lavozimda Xolid Mashal o‘rnini egalladi.

Tayyorlagan Отабек Матназаров

#Ismoil Haniya #Hamas

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.