ҲАМАС етакчиси Исмоил Ҳаниянинг дафн маросими Доҳада бўлиб ўтади

1 август куни Теҳронда Исмоил Ҳания билан видолашув маросими бўлиб ўтади, 2 август куни эса ҲАМАС етакчисининг жасади Қатар пойтахтида дафн этилади.

Фото: Anadolu Agency

Фаластиннинг ҲАМАС ҳаракати сиёсий бюроси раҳбари Исмоил Ҳаниянинг дафн маросими Қатар пойтахти Доҳада бўлиб ўтади.

ҲАМАС ҳаракати баёнотида 1 август куни Теҳронда Исмоил Ҳания билан видолашув маросими бўлиб ўтиши, шундан сўнг ҲАМАС етакчисининг жасади Теҳрондан Доҳага етказилишини таъкидлади.

Баёнотда қайд этилганидек, 2 август куни Қатар пойтахтида аҳоли, Фаластин фракциялари ҳамда араб ва ислом давлатлари вакиллари иштирокида жаноза намози ва дафн маросими бўлиб ўтади.

Теҳронда ҲАМАС етакчисининг ўлдирилиши

Фаластиннинг ҲАМАС ҳаракати сиёсий бюроси раиси Исмоил Ҳания Эроннинг янги сайланган президенти Масъуд Пезешкиён инаугурация маросимида иштирок этиш учун Теҳронга келди.

Ислом инқилоби муҳофизлари корпуси (ИИМК) 31 июл куни эрталаб Эрон пойтахтида Исмоил Ҳания қароргоҳига зарба берилгани ҳақида маълумот тарқатди.

Эрон ва ҲАМАС Исроилни қотилликни уюштирганликда айблади. Бироқ Исроил расмийлари воқеага изоҳ беришдан ўзини тийиб турибди.

Исмоил Ҳания 2017 йил 6 май куни ҲАМАС сиёсий бюроси раҳбари этиб сайланган эди. У бу лавозимда Холид Машал ўрнини эгаллади.

Тайёрлаган Отабек Матназаров

#Исмоил Ҳания #Ҳамас

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.