Rossiya Oliy sudi urush qatnashchilari ishini sud bosqichida to‘xtatmoqchi

Oliy sud loyihasida urush qatnashchilariga nisbatan jinoyat ishlari sudda ko‘rib chiqilayotgan vaqtda to‘xtatilishi mumkinligi ko‘rsatilgan. Hozir bunga faqat tergov bosqichida yoki hukm chiqarilgandan keyin ruxsat beriladi.

Foto: Yekaterina Kuzmina / RBK

Rossiya Oliy sudi urush qatnashchilarini jinoiy javobgarlikdan ozod qilish mexanizmini to‘ldirishni va Ukrainada jang qilishga rozi bo‘lganlar jinoiy ishlarini nafaqat tergov bosqichida, balki sud jarayonlarining o‘zida ham to‘xtatib qo‘yishni taklif qildi. Bu haqda 13 avgust, seshanba kuni TASS xabar berdi.

Agentlik ma’lumotlariga ko‘ra, tegishli qonun loyihasi Oliy sud plenumida taqdim etilgan va uni Davlat dumasiga kiritish rejalashtirilgan.

2024 yil mart oyidan boshlab jinoyat qonunchiligiga harbiy xizmatga chaqirilgan yoki qurolli kuchlar bilan shartnoma tuzgan shaxslarga nisbatan jinoyat ishlarini to‘xtatib turish va ehtiyot choralarini bekor qilish imkonini beruvchi o‘zgartishlar kuchga kirdi. Shu bilan birga, jinoiy javobgarlikdan ozod qilish faqat dastlabki tergov bosqichida - ish sudga topshirilgunga qadar, shuningdek hukm chiqarilgandan keyin amalga oshishi mumkin.

Oliy sud qonun loyihasi ushbu mexanizmni sud muhokamasi bosqichida, jinoyat ishi sudga yuborilgan va birinchi instansiya yoki apellyatsiya sudida bo‘lganida qo‘llashni taklif qilmoqda, deb yozadi TASS. Ish birinchi bo‘lib kelib tushgan sud, hukm chiqargan sud yoki apellyatsiya instansiyasi jinoyat ishini to‘xtatib turishi va ehtiyot chorasini bekor qilishi mumkin.