Yevropada kuchli suv toshqinlari - fotosuratlar

Kuchli yomg‘ir minglab uylarni suv ostida qoldirdi, halok bo‘lganlar bor.

Markaziy va Sharqiy Yevropa mamlakatlarida — kuchli suv toshqinlari ro‘y bermoqda. Dam olish kunlarida materik uzra «Boris» bo‘roni o‘tdi va kuchli yomg‘irlar boshlandi. Tabiiy ofatdan eng ko‘p zararni Avstriya, Chexiya, Polsha, Ruminiya, Slovakiya, Vengriya davlatlari ko‘rishmoqda. Ushbu mamlakatlardagi ko‘plab shaharlar va qishloqlarni to‘liq suv bosgan, o‘n minglab kishilar elektr energiyasisiz qolgan. Polsha va Chexiyada ikki to‘g‘on buzilib ketgan. Vena atrofidagi hududlar halokat zonasi deb e’lon qilindi. Bratislavada favqulodda holat rejimi joriy etilgan. Qator regionlarda rasmiylar fuqarolarni shoshilinchda evakuatsiya qilmoqda. Dastlabki ma’lumotlarga ko‘ra, suv toshqini oqibatida kamida yetti kishi halok bo‘lgan (Avstriyada qutqaruv amaliyotida ishtirok etgan o‘t o‘chiruvchi, Polshada bir kishi, Ruminiyada besh kishi). Chexiyada bir necha kishi bedarak yo‘qolgan deb hisoblanmoqda.