Bayden Ukrainaga 8 mlrd dollar ajratilishini e’lon qildi

Qo‘shma Shtatlar ma’muriyati Ukrainaning Rossiya Federatsiyasiga qarshi mudofaa urushidagi ehtiyojlari uchun qo‘shimcha deyarli 8 milliard dollar (taxminan 7,2 milliard yevro) ajratadi. Bu haqda AQSh prezidenti Jo Bayden 26 sentabr, payshanba kuni Oq uy veb-saytida Ukraina prezidenti Volodimir Zelenskiy bilan uchrashuvi oldidan murojaatida ma’lum qildi.

Amerika prezidentining xabaridan ko‘rinib turibdiki, Bayden AQSh Mudofaa vazirligiga avvalroq Kongress tomonidan ajratilishi ma’qullangan barcha mablag‘larni Ukrainaga yordam berishga yo‘naltirishni topshirgan. Xususan, 5,5 milliard dollar Ukrainani Pentagon arsenallaridan Amerika harbiy texnikasi bilan ta’minlash, shuningdek, Ukraina arsenallarini yangi texnika bilan to‘ldirishga yo‘naltiriladi.

Yana 2,4 milliard dollar Ukrainaga xavfsizlik sohasida yordam berish tashabbusi doirasida Kiyevga harbiy texnika yetkazib berish uchun ajratilgan: yangi havo hujumidan mudofaa tizimlari, shu jumladan yana bir Patriot tizimi va unga o‘q-dorilar, shuningdek, "havo-yer" sinfidagi raketalar va UUA. «Keyingi yil davomida Ukraina yana yuzlab qo‘shimcha Patriot va AMRAAM raketalari bilan ta’minlanadi hamda Ukrainaga o‘z shaharlari va aholisini himoya qilishga yordam beriladi», — deyiladi Bayden bayonotida.

Mablag‘lar, shuningdek, Ukraina harbiy sanoatini mustahkamlash uchun ishlatiladi va shu yil oxirigacha yoki Baydenning prezidentlik muddati tugashidan oldin, ya’ni 2025 yil 20 yanvargacha ajratilishi kerak.

Bayden Kiyevga qisqaroq masofadagi variantni taklif qildi

Ukrainaning uzoq masofaga uchish qobiliyatini oshirish uchun Oq uy rahbari ukrainlarga 110 km masofadagi nishonlarni urishga qodir JSOW qanotli bombalarini yetkazib berishga qaror qildi — bu ATACMS raketalaridan ham kamroq. Bayden Ukraina Rossiya hududiga hujum qilish uchun JSOW'dan foydalana oladimi yoki yo‘qmi, buni aniqlashtirmadi.

Bir kun avval Zelenskiy Bayden bilan yettilik guruhi (G7) va Ukraina yetakchilarining qo‘shma uchrashuvi chog‘ida uchrashgan edi. 26 sentabr oqshomida u Oq uyda AQSh prezidenti bilan batafsilroq muzokaralar olib bordi. Zelenskiy unga «g‘alaba rejasi»ni taqdim etishini aytgandi.