Toshkentda shifokor muolaja paytida mijoz ayolni o‘pib oldi

Kun.uz’ga kelib tushgan sud hujjatlariga ko‘ra, Toshkent shahrida yashovchi E.B. 2024 yil 19 sentabr kuni IIBga murojaat qilib, o‘zini muolaja qilgan shifokorning xatti-harakatlari yuzasidan ariza bergan.

Ma’lum bo‘lishicha, ayol muolaja olish maqsadida “PLAN BABY” xususiy klinikasiga borganida, unga oldindan tanish bo‘lmagan shifokor N.I. yuz qismiga tibbiy muolaja qilayotgan vaqtida, nomaqbul hamda sha’ni va qadr-qimmatini tahqirlaydigan, shahvoniy xususiyatga ega bo‘lgan harakatlar qilgani haqida xabar bergan.

IIB tomonidan holat yuzasidan surishtiruv ishlari olib borilib, N.I.ga nisbatan ma’muriy huquqbuzarlik to‘g‘risidagi bayonnoma rasmiylashtirilgan va ish sudga o‘tkazilgan.

2023 yil 23 sentabr kuni Jinoyat ishlari bo‘yicha Yunusobod tumanida o‘tkazilgan sud majlisida so‘roq qilingan N.I. aybiga iqrorlik bildirib, E.B.ni yaxshi ko‘rib qolganidan o‘pganini, o‘zini tutib tura olmaganini, qilgan ishidan pushaymonligini aytib, kechirim so‘ragan.

Sudya N.I.ni MJtKning 41-1-moddasi, 1-qismida nazarda tutilgan huquqbuzarlikni sodir etgan deb topgan. Unga besh sutka qamoq jazosi tayinlangan.

Sudlanuvchi bu qarorga rozi bo‘lmagan va tegishli tartibda apellyatsiya shikoyati kiritgan.

2024 yil 26 sentabr kuni Toshkent shahar sudi jinoyat ishlari bo‘yicha apellyatsiya sudida N.I.ning apellyatsiya shikoyati ko‘rib chiqilgan.

Sudya ish hujjatlarini o‘rganib, N.I.ning xatti-harakatlari MJtKning 411 -moddasi 1-qismi bilan to‘g‘ri kvalifikatsiya qilingan deb topgan.

Unga nisbatan 2024 yil 23 sentabr kuni qabul qilingan sud qarorini o‘zgartirishsiz qoldirgan.