Fuqaroni Koreyaga ishga yuborishni va’da qilgan shaxs ushlandi

Farg‘ona viloyatining Marg‘ilon shahrida fuqaroni Janubiy Koreyaga ishga yuborishni va’da qilgan shaxs qo‘lga olindi.

Foto: Iqtisodiy jinoyatlarga qarshi kurashish departamenti

Bosh prokuratura huzuridagi Iqtisodiy jinoyatlarga qarshi kurashish departamenti xabariga ko‘ra, B.I. (firibgarlik jinoyati uchun sudlangan) fuqaro B.R.ga Janubiy Koreyaga ishga yuborishini aytib, unga qalbaki hujjatlarni tayyorlab berib, evaziga 9 300 dollarni qo‘lga kiritganligi aniqlangan.

Tekshiruv davomida B.I. tomonidan 500 AQSh dollarining qaytarilishi protsessual tartibda rasmiylashtirilgan.

Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.