Filmlar, qo‘shiqlar va seriallar «ma’naviy ekspertizadan» o‘tkaziladi

Ekspertizadan o‘tmagan media mahsulotlarning namoyish etilishini to‘xtatish bo‘yicha tegishli vazirlik, idora va tashkilotlarga taklif kiritiladi.

Seriallar, multfilmlar, filmlar va qo‘shiqlar «ma’naviy ekspertizadan» o‘tkaziladi. Bu haqda Ma’naviyat va ma’rifat markazi rahbari Otabek Hasanov telegram-kanalida joylashtirilgan videodan ma’lum bo‘lmoqda.

Qayd qilinishicha, mutaxassislar O‘zbekiston va xorijda ishlab chiqarilgan ommaviy axborot vositalarining davlat siyosati, davlat ramzlari, milliy va umuminsoniy qadriyatlar, ma’naviy-axloqiy mezonlarga muvofiqligini o‘rganadi. Shuningdek, insoniy fazilatlarga zid axloqsizlik va odobsizlik targ‘ibotining mavjudligi ham tekshiriladi.

Mutaxassislar media-mahsulotlarning yoshlar tarbiyasi va milliy mentalitetga ta’sirini baholaydi. Bundan tashqari, yoshlar tarbiyasiga, milliy urf-odatlarga putur yetkazuvchi media mahsulotlari tarqalishining oldini olish choralarini ko‘radi.

Bunday media mahsulotlarning namoyish etilishini to‘xtatish bo‘yicha tegishli vazirlik, idora va tashkilotlarga taklif kiritiladi.

Videoda mavzuga doir boshqa ma’lumotlar keltirilmagan.