Abxaziya rahbari iste’foga chiqmasligini ma’lum qildi

O‘zini mustaqil deb e’lon qilgan Abxaziya respublikasi rahbari Aslan Bjaniya muxolifat talablariga zid ravishda iste’foga chiqmasligini aytdi. Bu haqda 15 noyabr, juma kuni Telegramʼdagi «Apsny Iaxa» axborot kanali xabar berdi.

«Abxaziya prezidenti, Abxaziya vitse-prezidenti, bosh vazir, hukumat a’zolari Abxaziyada va shu yerda bo‘ladilar va ishlashda davom etadilar», — dedi Bjaniya va o‘zini mustaqil deb e’lon qilgan respublika hududini tark etmaganini qo‘shimcha qildi.

Bjaniya matbuot xizmati uning murojaatidan keyin u Rossiya harbiy bazasi hududiga ko‘chirilgani haqidagi da’volarni rad etdi. Bjaniya o‘zi tug‘ilib o‘sgan Tamish qishlog‘ida, deya ishontirmoqda matbuot xizmati.

«Apsny Iaxa» kanali siyosatchi Xavfsizlik kengashi yig‘ilishini o‘tkazmagani haqida xabar berdi.

Muxolifat: «Aslan Bjaniyaning iste’foga chiqishiga bir soat vaqt bor»

O‘z navbatida, muxolifat vakili Levan Mikaa ultimatum qo‘ydi: «Aslan Bjaniyaning iste’foga chiqishiga bir soat vaqt bor, aks holda u yashiringan joyga kelamiz!» Muxolifatchining so‘zlarini «D News Abxaziya» Telegram-kanali keltirdi.

Mintaqadagi ommaviy noroziliklarga Rossiya Federatsiyasi bilan imzolangan investitsiya kelishuvi sabab bo‘lgan.

15 noyabr kuni kelishuvni ratifikatsiya qilish niyatida bo‘lgan parlament binosi oldida yuzlab namoyishchilar yig‘ilgan edi. Huquq-tartibot idoralari xodimlari va namoyishchilar o‘rtasida to‘qnashuvlar kelib chiqqan, politsiya ko‘zdan yosh oqizuvchi gaz ishlatgan.

Namoyishchilar parlament majlislar zaliga bostirib kirishdi. Rossiya bilan investitsiya shartnomasini ratifikatsiya qilishdan bosh tortishdan tashqari, ular Bjaniyaning iste’fosini talab qilishdi. Abxaziya Sog‘liqni saqlash vazirligi ma’lumotlariga ko‘ra, kamida to‘qqiz kishi jarohatlangan.

Abxaziyada qo‘lga olingan muxolifatchilar ozod qilindi

O‘zini mustaqil deb e’lon qilgan Abxaziya respublikasida avval qo‘lga olingan barcha namoyishchilar qo‘yib yuborildi, deb xabar qildi matbuot 12 noyabr kuni. Faollar Umar Smir, Garri Kokayu, Almasxan Ardzinba, Ramaz Jopua va Aslan Gvaramiya bir kun avval Suxumi shahri yaqinida ushlangan edi. «Abxaziya milliy birligi forumi» muxolifat partiyasi raisi Aslan Barsitsning aytishicha, ularning barchasi «yaqinda imzolangan Rossiya-Abxaziya investitsiya faoliyati to‘g‘risidagi kelishuvga bag‘ishlangan Gudauta rayonidagi ommaviy yig‘ilishdan» qaytayotgan bo‘lgan.

Barsits voqeani siyosiy sabablarga ko‘ra ta’qib deb atadi, garchi o‘zini mustaqil deb e’lon qilgan respublika rasmiylari muxolifatchilar «noqonuniy harakatlar» uchun qo‘lga olinganini da’vo qildi.