“Elektron soliq xizmatlarining ish faoliyati vaqtinchalik cheklanadi “- Soliq qo‘mitasi

Soliq qo‘mitasining katta hajmli ma’lumotlar bazasini bosqichma-bosqich yangi serverlarga migratsiya qilish jarayoni davom etmoqda, deb xabar beradi qo‘mita matbuot xizmati.

Shu munosabat bilan, 2024 yil 30 noyabr soat 00:00 dan 2 dekabr soat 06:00 ga qadar ayrim axborot tizimlari va elektron soliq xizmatlarining ish faoliyati vaqtinchalik cheklanadi.

Xususan:

Munis va onlayn to‘lov tizimlari orqali soliq to‘lovlari;
fuqarolarning ShJBP fondiga to‘lovlar;
quyoshli xonadon;
deklaratsiya yuborish;
korxonalarni ixtiyoriy va majburiy tugatish;
elektron murojaatlar va boshqa xizmatlarda uzilishlar kuzatiladi.

«Keltirilgan noqulayliklar uchun oldindan uzr so‘raymiz», — deyiladi xabarda.

Eslatib o‘tamiz, oktyabr oxirlarida ham Soliq qo‘mitasi katta hajmdagi ma’lumotlar yangi serverlarga migratsiya qilinayotgani sabab besh kunga onlayn NKT cheklarini tahrirlash imkoniyati vaqtinchalik cheklagandi.