Yangi Suriyada terrorchi tashkilotlarga o‘rin yo‘q – Erdo‘g‘an

Turkiya prezidenti Rajab Toyyib Erdo‘g‘an Iroq Kurd mintaqaviy boshqaruvi (KRAI) bosh vaziri Masrur Barzoniy bilan Anqarada uchrashdi.

Anadolu xabariga ko‘ra, Erdo‘g‘an va Barzoniy avvaliga yakkama-yakka uchrashuv o‘tkazgan, so‘ngra kengaytirilgan delegatsiyalar formatida muzokaralar bo‘lib o‘tgan.

Erdo‘g‘an uchrashuvda mintaqa barqarorligi va farovonligini oshiradigan loyihalarni, ayniqsa, «Taraqqiyot yo‘li» loyihasini amalga oshirish zarurligini ta’kidlagan. Turkiyaning o‘lka bilan aloqalari va mintaqaviy masalalar muhokama qilingan.

Erdo‘g‘an Suriyadagi so‘nggi voqealarni hisobga olib, Turkiyaning Iroq barqarorligi va xavfsizligini saqlashga katta ahamiyat berishini va Suriyadagi voqealar mintaqada yangi beqarorlikka olib kelmasligini ta’minlashga harakat qilishini aytgan.

Turkiya davlati rahbarining so‘zlariga ko‘ra, yangi Suriyada terrorchi tashkilotlar va ularga aloqador unsurlarga o‘rin yo‘q.

Avvalroq, Rajab Toyyib Erdo‘g‘an parlamentda hukmron Adolat va taraqqiyot partiyasi a’zolari bilan muloqot chog‘ida Suriyadagi kurd qurolli guruhlar yo qurollarini tashlaydi yoki «ko‘miladi» degan edi.

Turkiya AQSh bilan ittifoqdosh Suriya demokratik kuchlarining (SDF) asosiy tarkibiy qismi bo‘lgan kurd Xalq mudofaasi bo‘linmalarini (YPG) Turkiyaga qarshi isyon olib borayotgan Kurdiston ishchilar partiyasining bir bo‘lagi deb biladi.

Bashar Asad ag‘darilganidan keyin Anqara Suriya kelajagida YPG guruhiga o‘rin yo‘qligini ta’kidlab, uni tarqatib yuborishni talab qilib kelmoqda. KIP – Turkiya, AQSh va Yevropa Ittifoqi tomonidan terror tashkiloti deb tan olingan.