Buyuk Britaniya o‘zbekistonliklar uchun mavsumiy ishlarga kvotalar sonini oshiradi

Buyuk Britaniyadagi rekruting kompaniyalar vakillari bilan onlayn uchrashuv tashkil qilindi, deb xabar beradi Migratsiya agentligi.

Qayd etilishicha, muloqot Migratsiya agentligi, Xalqaro migratsiya tashkiloti, Buyuk Britaniyaning Seasonal Workers Scheme loyihasi doirasida faoliyat yurituvchi rasmiy operatorlar va ularning faoliyatini muvofiqlashtiruvchi ALP (Ishchi kuchi yetkazib beruvchilar asotsiatsiya) hamda GLAA (Mehnat huquqlarini himoya qilish bo‘yicha tashkilot) tashabbusi bilan o‘tkazilgan.

Unga Buyuk Britaniyaning O‘zbekiston bilan ishlab kelayotgan ikki kompaniyasi bilan bir qatorda Agri-HR-Ltd, Fruitful jobs LTD, Concordia Charity kabi yangi rekruting tashkilotlari rahbarlari ham jalb qilingan.

«Angliyadagi mavsumiy ishlarga o‘zbekistonliklarni jalb qilish mexanizmlari atroflicha muhokama qilindi. Nomzodlarni topish, saralash, imtihon jarayonlarini shaffof tashkil qilish bunda muhim o‘rin tutishi qayd etildi», — deyiladi xabarda.

Ta’kidlanishicha, agentlik rahbariyati Angliyaning O‘zbekiston bilan ishlash istagidagi barcha rekruting operatorlari bilan shartnoma tuzib, mamlakat fuqarolari uchun ajratiladigan kvotalar sonini ko‘paytirishga kelishib olgan.

Avvalroq Migratsiya agentligi va HOPS rekruting kompaniyasi 10 yanvar kuni O‘zbekiston fuqarolariga yaxshi daromad va oson shartlarda Angliyaga mavsumiy ish o‘rinlari uchun tanlov o‘tkazgandi. Ko‘r o‘tmay 3 millionga yaqin o‘zbekistonlik ariza topshirgan tanlov natijalari bekor qilindi. Migratsiya agentligi sabab sifatida platformada texnik muammolar bo‘lganini ko‘rsatgan, Angliya kompaniyasi esa jarayonga “uchinchi shaxslarning aralashuvi haqida ishonchli xabarlar” olganini bildirgan edi.