HAMAS Isroilni tinchlik sulhini buzishda aybladi

HAMAS garovda saqlanayotgan Isroil fuqarolarining navbatdagi guruhini ozod etish jarayonini bekor qildi, deb xabar beradi The Jerusalem Post.

Garovdagilar va falastinlik mahbuslar almashinuvi bo‘yicha navbatdagi jarayon 15 fevral kuniga rejalashtirilgan edi.

HAMAS ushbu qarorni Isroil tomoni tinchlik sulhini buzgani sabab qabul qilganini bildirgan. Ta’kidlanishicha, Isroil G‘azo sektorining shimoliy qismida yashovchi aholining uyiga qaytishiga to‘sqinlik qilmoqda, shuningdek, mintaqaga gumanitar yordamlarni kiritmayapti.

HAMAS va Isroil o‘rtasidagi tinchlik sulhi 19 yanvardan kuchga kirgan. Uning 42 kun davom etadigan birinchi bosqichida HAMAS garovga olingan 33 kishini qo‘yib yuboradi, Isroil bo‘lsa 1,9 mingdan ziyod mahbusni ozod etadi va G‘azo sektoridan o‘z qo‘shinlarini olib chiqib ketishni boshlaydi.

Avvalroq Isroil bosh vaziri Binyamin Netanyahu garovga olinganlarni ozod qilish bo‘yicha kelishuvni oxiriga yetkazish, garovdagilarning barchasi ozod qilingach HAMAS yo‘q qilinishiga va’da bergandi. AQSh prezidenti Donald Tramp esa bir necha bor falastinliklar G‘azo sektoridan qo‘shni arab mamlakatlariga ko‘chirilishi, sektor hududi AQSh nazoratiga o‘tishi kerakligini ta’kidlagan.