AQSh prezidenti Donald Tramp Eron bilan keng ko‘lamli urushni yakunlash bo‘yicha kelishuvga yo‘l ochish maqsadida Isroildan Livandagi hujumlarini to‘xtatishni talab qilib kelmoqda. Hatto o‘tgan haftadagi telefon muloqoti chog‘ida u bosh vazir Binyamin Netanyahuni haqoratli so‘zlar bilan qattiq koyigan. Shunga qaramay, Isroil yakshanba kuni erta tongda — Livanda sulh rejasi e’lon qilinganidan beri ilk bor Bayrut hududiga zarbalar berdi.
7 iyun kuni Eron bunga javoban Isroildagi obektlarga qarata bir guruh raketalar uchirdi. Eron Islom inqilobi muhofizlari korpusi Nazaret yaqinidagi Ramat-David aviabazasini nishonga olganini ma’lum qildi. Isroil harbiylari esa Erondan uchirilgan raketalar aniqlangani va ularni havo mudofaa tizimlari urib tushirganini bildirdi.
Ammo, tarmoqlarda Eronning bir necha raketasi Isroil hududiga tushgani, uni Temir gumbaz tutib qololmagani aks etgan videolar tarqaldi.
Eronning tinchlik muzokaralaridagi bosh vakili, parlament spikeri Muhammad Boqir G‘olibofning ta’kidlashicha, AQSh bazalari va Isroil aktivlari – dushmanlik harakatlari, jumladan, «Livan bo‘yicha kelishuvlarning buzilishi» sababli qonuniy nishonlar hisoblanadi.
Yakshanba kuniga qadar, aprel oyida keng ko‘lamli urushda o‘t ochishni to‘xtatish rejimi boshlanganidan beri Eron Isroilga hujum qilmagan edi, garchi «Xizbulloh» buni amalga oshirgan bo‘lsa ham.
Bir necha soat o‘tgach, Isroil mudofaa kuchlari Eron harbiy obektlariga zarba berganini ma’lum qildi. Muhofizlar korpusiga ko‘ra, Isroil Eron ichkarisidagi obektlarga havoda uchiriladigan ballistik raketalar yordamida hujum uyushtirgan.
Tramp: «Hammasi joyida»
Axios nashriga ko‘ra, Tramp va Netanyahu yakshanba kuni telefonda yarim soatga yaqin gaplashgan. Nashr iqtibos keltirgan AQSh rasmiysining so‘zlariga ko‘ra, Tramp muloqot chog‘ida Netanyahuga navbatdagi zarbalardan tiyilishni aytgan, chunki «biz kelishuv borasida yaxshi bir natijaga erishishga yaqinmiz».
