Farg‘onada narkolaboratoriya fosh etildi

Narkolaboratoriya Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan bojxona va ichki ishlar organlari xodimlari ishtirokida o‘tkazilgan tezkor tadbirda aniqlangan.

Ma’lum qilinishicha, Marg‘ilon shahrida yashovchi, 1990 va 2001 yillarda tug‘ilgan 3 nafar shaxs Farg‘ona tumani Mindonobod mahallasidagi uylardan birini har oyda 250 AQSh dollari to‘lash sharti bilan ijaraga olishgan. Ular xonadonda giyohvandlik vositalari tayyorlash bilan shug‘ullanib kelishgan.

Ko‘zdan kechirish davomida, ushbu manzildan 8 kg 185 gr Alfa-PVP, 4 kg 209 gr “Spays”, 427 gr “Mefedron” sintetik narkotik moddalari hamda ularni tayyorlashda kerak bo‘ladigan 12 kg 326 gr maxsus suyuqlik va 13 kg 925 gr tamaki mahsulotlari ashyoviy dalil sifatida olindi.

Ekspertiza xulosasiga ko‘ra, tezkor tadbir davomida olingan jami 12 kg 821 gr sintetik narkotik moddalarning qora bozordagi bahosi 9 mlrd 185 mln so‘mni tashkil etadi.

Tergovga qadar tekshiruv davomida aniqlanishicha, qonunbuzarlar internet tarmog‘i orqali giyohvandlik vositalari sotish bilan shug‘ullanuvchi jinoiy guruh a’zolari tomonidan “zakladka” usulida yetkazib berilgan xomashyo mahsulotlari asosida narkotik moddalar tayyorlab, viloyat bo‘yicha belgilangan xufiya joylarga qoldirib, ularning geolokatsiyasini jinoiy guruh a’zolariga yuborib turishgan.

Buning evaziga uchala shaxsning har biri haftasiga kriptovaluta ko‘rinishida 500 AQSh dollaridan maosh olgan.

Hozirda mazkur shaxslarga nisbatan Jinoyat kodeksining 273-moddasi 4-qismi “b” bandi bilan jinoyat ishi qo‘zg‘atilib, qamoq ehtiyot chorasi qo‘llangan.