Husiychilar Isroilga aloqador kemalarga yangi hujumlar bilan tahdid qildi

Yamanda husiychilar Isroilga G‘azo sektoriga gumanitar yordam yetkazish uchun bergan muddat tugaganidan keyin Isroil bilan bog‘liq kemalarga hujumlarni qayta boshlash bilan tahdid qilishdi. Bu haqda 12 mart, chorshanba kuni AFP agentligi yozgan.

Agentlik tomonidan keltirilgan isyonchilar bayonotida ular Qizil va Arab dengizlari, Bob al-Mandeb bo‘g‘ozi va Adan ko‘rfazida «barcha Isroil kemalarining o‘tishiga taqiq»ni yangilash niyatida ekani aytiladi.

Sulh vaqtida kemalarga hujumlar to‘xtashi

Yanvar oyi oxirida husiychilar Qizil dengizdagi kemalarga hujumlarni G‘azo sektoridagi o‘t ochishni to‘xtatish muddati davomida cheklashlarini e’lon qilishdi. AQSh, Misr va Qatar vositachiligida tuzilgan olti haftalik otashkesim 19 yanvardan kuchga kirdi. Biroq, Isroil va Hamas tashkiloti keyingi harakatlar bo‘yicha kelisha olmayapti, deb eslatadi AFP.

Bir haftadan ko‘proq vaqt oldin Isroil G‘azo sektoriga insonparvarlik yordami va keyinroq elektr energiyasi yetkazib berishni to‘xtatdi. Isroil bosh vaziri Binyamin Netanyahuning aytishicha, qattiq yondashuv Hamasni o‘t ochishni to‘xtatishning ikkinchi bosqichi bo‘yicha o‘z shartlarini qabul qilishga ko‘ndirish uchun mo‘ljallangan.

O‘z navbatida, husiychilar 7 mart kuni Isroil G‘azo sektoriga gumanitar yordam yetkazishga qaytmasa, Qizil dengizdagi kemalarga hujumlarni qayta boshlash bilan tahdid qilgan edi.

Yamandagi husiychilar 200 mlrd dollarlik iqtisodiy zarar keltirdi

Yaman husiychilarining o‘tgan yili jahon savdosiga yetkazgan zarari deyarli 200 milliard dollarni tashkil qildi. Dengiz orqali yuk tashish narxi besh baravarga oshdi, deya xabar berdi Londonda chop etiladigan The Economist nashri 18 yanvar kuni.

Misr eng ko‘p to‘g‘ridan to‘g‘ri zarar ko‘rdi, Suvaysh kanalidan tushgan daromadning 7 milliard dollarini yo‘qotdi - odatdagi daromadning uchdan bir qismini. AQSh Qizil dengizdagi kemalarni himoya qilish uchun besh milliard dollar sarfladi.

2024 yil davomida husiychilar kemalarni Afrikani aylanib o‘tishga majbur qildi. Osiyodan yo‘nalishlar taxminan olti ming kilometrga uzaytirildi, sayohat vaqti esa 10-14 kunga ko‘paydi. AQSh razvedkasi ma’lumotlariga ko‘ra, yuqori tezlikda uzoqroq safarlar yonilg‘i sarfini oshirib, har bir reys narxiga taxminan 1 million dollar qo‘shadi. The Economist manbalariga ko‘ra, Qizil dengiz orqali tashish uchun sug‘urta tariflari 20 baravar oshdi.