Toshkentdagi ko‘pqavatli uyda odamlar liftda qamalib qoldi

Lift qavatlar oralig‘ida to‘xtab qolgan, keyinchalik odamlar liftdan chiqarilgan.

Foto: Qurilish va uy-joy kommunal xo‘jaligi vazirligi

Toshkent shahri, Yashnobod tumani, Normuhammedov dahasi 12-uyning liftida nosozlik yuz berdi. Ijtimoiy tarmoqlarda tarqalgan videoga ko‘ra, lift ichidagi odamlari bilan birga harakatdan to‘xtab qolgan.

Qurilish va uy-joy kommunal xo‘jaligi vazirligi xabariga ko‘ra, lift to‘xtash qavatiga kelganda sekinlashtirish funksiyasini amalga oshiruvchi datchik nosozligi tufayli o‘z vaqtida kerakli signal yetib bormagan. Shu bois liftning himoya fuksiyasi ishlab, 2- va 3- qavatlar oralig‘ida harakatlanishdan to‘xtagan.

Ta’kidlanishicha, ko‘p qavatli uyga xizmat ko‘rsatuvchi «Eco hudud» va lift ekspluatatsiyasini shartnoma asosida amalga oshirib kelayotgan «Xavfsiz lift» tashkilotining 24/7 dispetcherlik xizmatiga murojaat kelib tushgach, tashkilot vakillari hodisa joyiga borib, odamlarni 4-5 daqiqa ichida liftdan chiqarib olishga muvaffaq bo‘lgan. Hozir lift qurilmasi soz holatga keltirilgani aytilmoqda.

Qurilish va uy-joy kommunal xo‘jaligi vaziri o‘rinbosari Ozoda Jo‘rayeva Yashnobod tumani hokimi, Sanoat, radiatsiya va yadro xavfsizligi qo‘mitasi vakillari va boshqa mutasaddi tashkilotlar bilan holatni muhokama qilgan. Bunda tizimni raqamlashtirish, kuzatuv mexanizmini yanada kuchaytirish lozimligi ta’kidlanib, lift kabinalarida aloqa kanallarini yaxshilash yuzasidan aniq topshiriqlar berilgan.