AQSh Senati qisqa muddatli budjetni tasdiqlash orqali shatdaunga yo‘l qo‘ymadi

AQSh Senati 14 mart, juma kuni mamlakat hukumatiga shatdaunga imkon bermaydigan olti oylik xarajatlar to‘g‘risidagi qonun loyihasini qabul qildi. Loyiha zarur bo‘lgan 60 ta o‘rniga 62 ta ovoz oldi. Xususan, uni Respublikachilar partiyasidan 53 senatordan 52 nafari, Demokratik partiyadan esa 10 nafari qo‘llab-quvvatladi. Kongress tomonidan ma’qullangandan so‘ng, hujjat AQSh prezidenti Donald Tramp tomonidan imzolanishi kerak.

Yangi budjet taklifi mudofaa xarajatlarini biroz oshirishni va mudofaa bilan bog‘liq bo‘lmagan bir qator hukumat dasturlari uchun xarajatlarni taxminan 13 milliard dollarga qisqartirishni o‘z ichiga oladi.

Ovoz berish demokrat senatorlar orasida kelishmovchilikni keltirib chiqardi

Demokrat ozchilik yetakchisi Chak Shumer davlat idoralarini yopish va ularni moliyalashdan qochish uchun qisqa muddatli xarajatlar to‘g‘risidagi qonun loyihasini qo‘llab-quvvatlashga qaror qildi. Uning so‘zlariga ko‘ra, shatdaunning boshlanishi respublikachilar tomonidan taklif qilingan budjetni qabul qilishdan ko‘ra yomonroq bo‘ladi.

Shunga qaramay, demokrat senatorlarning katta qismi olti oylik budjetni tasdiqlashga qarshi ovoz berdi.

AQSh Vakillari palatasining Demokratik partiyadan a’zosi Aleksandriya Okasio-Kortes shu kuni kechqurun Senatdagi ovoz berish butun partiyada «chuqur g‘azab hissi» qoldirganini aytdi. U sodir bo‘lgan voqeani «katta shapaloq» deb atadi.