Zelenskiy yana Moskvani urushni tugatishni istamaslikda aybladi

Ukraina prezidenti Volodimir Zelenskiy yana bir bor Rossiyani urushni tugatishdan manfaatdor emaslikda aybladi. «Ushbu haftada bizning shaharlar va jamoatlarimizga yuzlab hujumlar uyushtirildi. Ruslar 1020 dan ortiq hujumkor uchuvchisiz uchoqlar, deyarli 1360 ta boshqariladigan havo bombalari va 10 dan ortiq turli raketalarni uchirdi. Urushning tezroq tugashini istaganlar bunday qilmaydi», deb yozdi Zelenskiy ijtimoiy tarmoqda.

Ukraina prezidenti yana bir bor butun sivilizatsiyalashgan dunyo «Rossiyani o‘z agressiyasini to‘xtatishga majburlash uchun unga birgalikda bosim o‘tkazishi» zarurligini, yangi «hal qiluvchi choralar», jumladan, sanksiyalarni kuchaytirish kerakligini ta’kidladi. «Ukraina, Yevropa, Amerika va dunyoda tinchlikni istagan har bir kishi – biz birgalikda adolatli va mustahkam tinchlikni ta’minlay olamiz», — deya xulosa qildi u.

Bundan uch kun avval Zelenskiy Kremlni Rossiya va Ukraina o‘rtasida AQSh tashabbusi bilan tuzilgan tinchlik kelishuvini ataylab kechiktirishda ayblagan edi. «Afsuski, bir kundan ortiq vaqtdan beri (Jiddadagi uchrashuvdan keyin) dunyo bildirilgan takliflar yuzasidan Rossiyadan mazmunli javob eshitmayapti. Bu esa aynan Rossiya urushni davom ettirishga intilayotganini va tinchlik boshlanishini imkon qadar kechiktirishga harakat qilishini yana bir bor tasdiqlaydi», — deb yozdi u 13 mart kuni. Ukraina prezidenti, shuningdek, «AQSh bosimi Rossiyani urushni tugatishga majbur qilish uchun yetarli bo‘lishiga» umid bildirdi.

YeI vaqtinchalik sulh tuzilsa ham Ukrainani qurollantirishda davom etadi

Yevropa Ittifoqi 30 kunlik otashkesimga erishilsa, Ukrainaga qurol yetkazib berishni to‘xtatmoqchi emas. Bunday fikrni 14 mart kuni Yevropa Ittifoqi tashqi ishlar kengashi yig‘ilishi oldidan Yevropa Ittifoqining bir qancha davlatlaridan kelgan qator diplomatlar bildirishdi.

«Yevropa Ittifoqi Ukrainaning tinchlik muzokaralarida eng kuchli pozitsiyada bo‘lishini ta’minlashga intilmoqda, shuningdek, Tramp aytganidek «yomon» kelishuvdan voz kechib, muzokaralar uchun eng qulay vaqtni tanlashi mumkin. Agar tajovuzkor buni talab qilsa, Yevropa Ittifoqi va uning a’zolari Kiyevga qurol yetkazib berishni to‘xtatadi, deb o‘ylamayman», — dedi Bryusseldagi brifingda yevropalik diplomat.

Yana bir diplomat, shuningdek, potensial o‘t ochishni to‘xtatish vaqtida Ukraina qurollangan bo‘lishi kerakligini va hech qanday holatga yo‘l qo‘yib bo‘lmasligini ta’kidlab o‘tdi.