SSJ-100 halokati: Davlatlararo aviatsiya qo‘mitasi mas’uliyatni ekipajga yukladi

2019 yil 5 may kuni Moskva yaqinidagi Sheremetevo aeroportida ro‘y bergan Rossiyaning Sukhoi Superjet 100 (SSJ-100) samolyoti halokatining asosiy sababi  havo kemasi komandirining muvofiqlashtirilmagan boshqaruv harakatlari bo‘lgan, deb xabar qildi Davlatlararo aviatsiya qo‘mitasi. O‘shanda favqulodda qo‘nish va bortdagi yong‘indan so‘ng samolyotdagi 78 kishidan 41 nafari halok bo‘ldi. Tekshiruv yakunlangani haqida 28 mart, juma kuni DAQ saytida e’lon qilindi. 

Hisobotda gap borgan ekipaj komandirining harakatlari qo‘nish vaqtida va samolyotning uchish-qo‘nish yo‘lagi bo‘ylab «sakrashi» vaqtida sodir bo‘lgan.

Hisobotda aytilishicha, uchish-qo‘nish yo‘lagiga zarba samolyot korpusining konstruktiv elementlari va yonilg‘i baklarini vayron qilgan, natijada yonilg‘i to‘kilib, yong‘in kelib chiqqan. «Superjet ruxsat etilgan maksimal yuklardan sezilarli darajada oshib ketadigan ta’sirlarga duchor bo‘ldi, bu uning konstruksiyasi buzilishiga olib keldi», deb tushuntirdi aviatsiya sanoatidagi manba RBKga.

SSJ-100 halokati 

2019 yil 5 may kuni "Aeroflot" aviakompaniyasining Sukhoi Superjet yo‘lovchi samolyoti Moskva-Murmansk reysini amalga oshirayotgan bo‘lgan. Parvozga ko‘tarilganidan ko‘p o‘tmay, samolyot momaqaldiroqli frontga duch keldi, bortdagi elektronika ishlamay qoldi va ekipaj favqulodda qo‘nishni talab qildi. Qo‘nish vaqtida baklari to‘la bo‘lgan samolyot uchish-qo‘nish yo‘lagiga uch marta urilgan, yong‘in boshlangan va yong‘in samolyotning orqa qismini butunlay qamrab olgan. 78 yo‘lovchi va ekipaj a’zolaridan 37 nafari qutqarib olindi.

2023 yil iyun oyida havo kemasi kapitani Denis Yevdokimov Moskva oblasti sudi tomonidan olti yilga koloniyaga hukm qilindi.

Rossiya transport vazirligi ushbu rusumdagi samolyotlarning ekspluatatsiyasini to‘xtatmadi. Hozirda ular faqat Rossiya aviakompaniyalari tomonidan ishlatiladi.