Tanzila Norboyeva Parlamentlararo ittifoq bosh kotibi bilan uchrashuv o‘tkazdi

2 aprel kuni Oliy Majlis Senati raisi Tanzila Norboyeva Parlamentlararo ittifoq bosh kotibi Martin Chungong bilan uchrashuv o‘tkazdi. Bu haqda parlament yuqori palatasi matbuot xizmati xabar berdi.

Qayd etilishicha, uchrashuvda O‘zbekistonda o‘tkaziladigan Parlamentlararo ittifoqning yubiley 150-assambleyasiga tayyorgarlik ko‘rishga oid asosiy masalalar hamda parlament islohotlari sohasidagi hamkorlikni yanada rivojlantirish muhokama qilingan.

Shuningdek, assambleyaning O‘zbekistonda amalga oshirilayotgan islohotlarga to‘liq mos keladigan «Ijtimoiy rivojlanish va adolat uchun parlament harakati» mavzusining tarixiy ahamiyatiga alohida e’tibor qaratilgan. O‘zbekiston parlamenti faoliyatining ijobiy jihatlari boshqa mamlakatlar uchun namuna bo‘lishi mumkinligi ta’kidlangan.

«Martin Chungong O‘zbekiston parlamentining Parlamentlararo ittifoq bilan samarali hamkorligi uchun minnatdorlik bildirib, mamlakatning Parlamentlararo ittifoq faoliyatiga qo‘shayotgan salmoqli hissasini qayd etdi», — deyiladi xabarda.

Uchrashuv yakunida tomonlar Toshkentda o‘tkaziladigan Parlamentlararo ittifoqning yubiley assambleyasi xalqaro parlamentarizm tarixida muhim voqea bo‘lishiga va global muammolarni hal qilishda parlamentlarning rolini kuchaytirishiga ishonch bildirdi.