Avstriya chorva mollari orasida tarqalgan infeksiya sabab chegaralarini yopadi

Avstriya 5 apreldan boshlab Vengriya va Slovakiya bilan chegalarida joylashgan 24 ta nazorat-o‘tkazish punktlarini yopadi, deb xabar bermoqda Bild.

Qayd etilishicha, bunga qo‘shni davlatlarda oqsim kasalligi — juft tuyoqlilarda uchraydigan o‘tkir virus kasalligi tarqalgani sabab bo‘lmoqda.

Ayni vaqtda kasallik Avstriya chegarasidan bir necha kilometr uzoqlikdagi hududlarda tarqalgan. Vengriya va Slovakiya allaqachon minglab hayvonlarni yo‘q qilishni boshlagan, Avstriya shuningdek, qoramol, go‘sht, xom sut va yovvoyi qushlarning mamlakatga olib kirilishini taqiqlagan. Ushbu xavfsizlik choralari 20 mayga qadar amalda bo‘ladi. 

«Bu biz bilgan eng xavfli virus», — deydi Vena veterinariya universiteti virusologi Norbert Novotna.

Oqsim — yuqumli kasallik bo‘lib, barcha juft tuyoqliklar, jumladan, qoramollar, echki va qo‘ylarning o‘limiga olib keladi. Shuningdek, ushbu kasallik bug‘u kabi yovvoyi hayvonlarga ham yuqishi mumkin. Uning tarqalishi qishloq xo‘jaligi uchun xavf tug‘diradi.

Eslatib o‘tamiz, yanvar o‘rtalarida Germaniyadan Yevropa Ittifoqi tashqarisiga go‘sht va sut mahsulotlari eksporti jiddiy cheklovlarga duch kelgandi. O‘shanda bunga Berlin yaqinidagi ferma mollari orasida 40 yil ichida birinchi marta oqsil kasalligi qayd etilgani sabab bo‘lgan edi.