O‘zbekistonda eksklyuziv huquqqa ega kompaniyalar reyestri e’lon qilindi

Raqobat qo‘mitasi eksklyuziv huquqlarga ega xo‘jalik yurituvchi sub’yektlar reyestrini e’lon qildi.

Reyestrga 81 ta faoliyat turi bo‘yicha eksklyuziv huquqqa ega 67 ta kompaniya kiritilgan.

Yopiq hujjatlar asosida berilgan eksklyuziq huquqlar egalari alohida reyestrda yuritilishi ma’lum qilingan.

Ochiq reyestrga kirgan korxonalarning aksariyati davlatniki bo‘lib, ularning katta qismi – qurilish sohasiga to‘g‘ri keladi. Shuningdek, axborot texnologiyalari sohasidagi bir nechta korxonalarga u yoki bu yo‘nalishda eksklyuziv huquqlar berilgan.

Reyestrda qishloq xo‘jaligi, geologiya, farmatsevtika, turizm, sug‘urta va nashriyot faoliyati bilan shug‘ullanuvchi bir nechta korxonalarni ko‘rish mumkin.

Energetika sohasidan, gidroenergetika tarmog‘idagi ayrim tashkilotlar, shuningdek, “O‘zenergosotish” (elektr energiyasini markazlashgan tartibda xarid qilish va sotish), UzGasTrade (tabiiy gazni markazlashgan tartibda xarid qilish va sotish) hamda Milliy dispetcherlik markazini ro‘yxatda ko‘rish mumkin.

Reyestrdagi kam sonli xususiy shirkatlar qatoridan “CRPT Turon” MChJ joy olgan. Bu korxona ikkita eksklyuziv huquqqa ega: (1) “Asl belgisi” mahsulotlarni markirovkalash va kuzatib borish milliy axborot tizimiga operatorlik qilish hamda (2) majburiy markirovkalanadigan mahsulotlarni ishlab chiqaruvchilar va import qiluvchilarga markirovka kodlarini taqdim etish shular jumlasidan.

So‘nggi vaqtlarda Piskent avtopoligoni sabab tez-tez jamoatchilik e’tiboriga tushayotgan O‘zbekiston ilmiy-sinov va sifat nazorati markazi (UzTest) “davlat nazorati bilan bog‘liq sinovlarni amalga oshirish” bo‘yicha alohida huquqqa ega.

Ayni paytda, mobil qurilmalarning IMEI kodlarini majburiy ro‘yxatdan o‘tkazish tizimining operatori – Information Technology Center (AQSh) reyestrga kiritilmagan.

Shuningdek, foydali qazilmalarga kirish va ularning eksporti bo‘yicha eksklyuziv huquqqa egaligi aytiladigan kompaniyalar ham ochiq reyestrdan joy olmagan.

“Eksklyuziv huquqlar xo‘jalik yurituvchi subektlarga foydalanilishi, tarqatilishi va taqdim etilishi qonun bilan cheklangan normativ-huquqiy hujjatlar bilan berilganligi aniqlangan taqdirda, ularning reyestri belgilangan tartibda alohida yuritiladi”, – deyiladi ochiq reyestr so‘ngida taqdim etilgan izohda.