Davlat xaridlarida 28 mingdan ortiq raqobatga zid holat aniqlandi - Raqobat qo‘mitasi

Raqobat qo‘mitasi ma’lumotiga ko‘ra, davlat buyurtmachilari tomonidan o‘tkazilgan boshlang‘ich qiymati 18,8 trln so‘m bo‘lgan 23 mingdan ortiq davlat xaridlari o‘rganib chiqildi. Tahlillar natijasida 16 135 ta savdo jarayonida jami 28 304 ta raqobatga zid harakatlar qayd etildi.

Xususan, 16 017 ta holatda savdolarni o‘tkazish tartibi qonun hujjatlariga zid ravishda buzilgan. Shuningdek, 1 145 ta holatda ishtirokchilar faoliyatini muvofiqlashtirish, 801 ta holatda esa savdo ishtirokchilarini asossiz ravishda chetlashtirish holatlari aniqlangan.

Bundan tashqari, 8 647 ta holatda savdolarning ayrim ishtirokchilari uchun imtiyozli shart-sharoitlar yaratib berilgani, 685 ta holatda ishtirokchilar o‘rtasida, 61 ta holatda esa buyurtmachi va ishtirokchilar o‘rtasida affillanganlik holatlari qayd etilgan. Yana 948 ta holatda boshqa turdagi raqobatga zid harakatlar aniqlangan.

Aniqlangan qonunbuzilishlar huquqni muhofaza qiluvchi hamda boshqa vakolatli organlar bilan hamkorlikda o‘rganilib, 11 427 ta xarid bo‘yicha tegishli organlarga ma’lumotlar taqdim etildi. Shuningdek, 4 708 ta xarid yuzasidan ishlar qo‘zg‘atilib, davlat xaridlari sub’yektlarining mansabdor shaxslariga nisbatan 714 ta ma’muriy huquqbuzarlik to‘g‘risida bayonnoma rasmiylashtirilib, sudlarga yuborildi.

Qayd etilishicha, qonun buzilishiga yo‘l qo‘ygan korporativ buyurtmachilarga nisbatan moliyaviy jarimalar qo‘llanilib, kelgusida bunday holatlarning oldini olish bo‘yicha ko‘rsatmalar berilgan. Raqobat qo‘mitasi davlat xaridlarida adolatli raqobat muhitini ta’minlash bo‘yicha monitoring ishlarini davom ettirmoqda.