Toshkentda tegishli hujjatsiz reklama o‘rnatilgan mashinalarga chora ko‘rildi

Toshkent shahrida reklama pasportisiz harakatlanayotgan transport vositalarini aniqlash bo‘yicha nazorat tadbirlari o‘tkazilmoqda.

Tadbirlar Toshkent shahar IIBB Yo‘l harakati xavfsizligi boshqarmasi, shahar hokimligi hamda Raqobat qo‘mitasining hududiy boshqarmasi hamkorligida tashkil etilgan.

Qayd qilinishicha, so‘nggi reydlarda reklama joylashtirilgan 470 ta avtomobil tekshirilgan. Ulardan 390 tasida reklama pasporti mavjud emasligi aniqlangan. Ta’kidlanishicha, ularga «Reklama to‘g‘risida»gi qonun va Vazirlar Mahkamasining 104-son qarori talablariga zid holatlar bo‘yicha tegishli choralar ko‘rilgan.

Jumladan, ayrim haydovchilar reklama pasporti talabi haqida ma’lumotga ega emasligini bildirgan. Shu sababli joylarda huquqiy tushuntirish berilib, 389 ta ogohlantirish xati topshirilgan, 1 tasi jarima maydoniga joylashtirilgan.

Ta’kidlanishicha, tadbirkorlar bilan tushuntirish ishlari o‘tkazilib, reklama joylashtirish faqat my.gov.uz portali orqali pasport olingan taqdirda qonuniy hisoblanishi eslatilgan. Shundan so‘ng, reklama pasporti olish uchun 1200 ta ariza tushgan.

Xabar berilishicha, nazorat tadbirlari doimiy ravishda davom etadi.