Xivadagi davlat tashkilotlari shahar chekkasiga ko‘chiriladi

Shavkat Mirziyoyev 2 may kundagi yig‘ilishda Xiva shahrida faqat turistlarga xizmat ko‘rsatadigan obektlar bo‘lishi kerakligini ta’kidladi. Bu haqda prezident matbuot xizmati xabar qildi.

Angarik mahallasidagi bo‘sh maydonda ma’muriy binolar qurilib, Xiva shahridagi barcha davlat tashkilotlari shu yerga ko‘chiriladi.

Mutasaddilarga Urganch, Xivadagi barcha ma’muriy binolarni savdoga chiqarish bo‘yicha katta dastur ishlab chiqish topshirildi.

Xususiylashtirish dasturiga asosan 2025 yilda Xorazmda 41 ta davlat binosi, 350 gektar yer uchastkasi savdoga qo‘yilmoqda.

«Bu xizmat ko‘rsatish, turizm va ishlab chiqarish sohalari uchun katta imkoniyat», — dedi davlat rahbari.

Masalan, Urganch shahridagi o‘rganishlar natijasida 61 ming kvadrat maydoni, 21 gektar yeri bo‘lgan 45 ta davlat binosi aniqlandi. Ular negizida mehmonxona, xizmat ko‘rsatish va savdo markazlari, ko‘ngilochar maskanlar qurib, kamida 500 kishini band qilish mumkinligi ta’kidlandi.