«Jaloliddin Manguberdi» tezyurar poyezdi Toshkent – Xiva yo‘nalishida ilk qatnovni amalga oshirdi

5 may kuni «Toshkent-Markaziy» vokzalida Hyundai Rotem kompaniyasining Toshkent – Xiva – Toshkent yo‘nalishida qatnovchi birinchi «Jaloliddin Manguberdi» yo‘lovchi poyezdi tantanali ravishda yo‘lga chiqdi va manzilga yetib bordi.

Ushbu poyezd harakatini yo‘lga qo‘yish uchun O‘zbekiston temiryo‘lchilari tomonidan 450 kilometrlik «Buxoro – Urganch – Xiva» uchastkasi to‘liq elektrlashtirildi.

Qayd qilinishicha, ayni paytda poyezdlar Toshkentdan Xivagacha bo‘lgan masofani 14 soatda bosib o‘tayotgan bo‘lsa, Hyundai Rotem poyezdi harakatga qo‘yilishi bilan bu vaqt deyarli ikki barobarga qisqaradi: 1 ming 22 kilometrlik masofa 7,5 soatda bosib o‘tiladi.

Yettita vagondan iborat tarkib 389 nafar yo‘lovchini manzilga yetkazadi. Ilk qatnovda yo‘lovchilarning aksariyati xorijlik sayyohlar bo‘ldi. Reys davomida poyezd Samarqand, Buxoro va Urganch shaharlarida to‘xtab o‘tdi.

Ta’kidlanishicha, 2027 yildan boshlab, ushbu tezyurar poyezd qatnovini Nukus shahrigacha uzaytirilishi rejalashtirilgan.

Poyezd Toshkentdan Xivaga seshanba, payshanba va shanba hamda Xivadan Toshkentga esa chorshanba, juma va yakshanba kunlari harakatlanadi.