Toshkentdagi Qo‘yliq bozori yopilmasligi ma’lum qilindi

Ilgari muqobil savdo joylarini tayyorlash zarurati tufayli to‘xtatilgan Qo‘yliq bozori hududining bir qismini qayta qurish va obodonlashtirish ishlari qayta tiklandi. Bu haqda Toshkent shahri hokimligi xabar berdi.

Qayd qilinishicha, hozir bozor yanada tartibli holga keltirilgan — tadbirkorlar uchun joylar yaratildi va hududdagi ishlar faol davom etmoqda. Barcha ishlar bosqichma-bosqich amalga oshirilmoqda, shu bilan birga, savdo faoliyati to‘xtatilmagan.

«Bozor yopilmayapti, balki uning faoliyati optimallashtirilmoqda — tartib o‘rnatish, sanitariya sharoitlarini yaxshilash, infratuzilmani yangilash va umumiy xavfsizlik darajasini oshirishga alohida e’tibor qaratilmoqda. Bundan tashqari, kelgusida joriy etiladigan raqamlashtirilgan tizim soliq to‘lovlarining shaffofligini ta’minlash imkoniyatini yaratadi. Bu esa, o‘z navbatida, yashirin iqtisodiyotning bozordagi ta’sirini kamaytirishga yordam beradi», deyiladi xabarda.

Ta’kidlanishicha, tizimli qaror qabul qilinib, bozor xalqaro va zamonaviy shahar standartlariga mos holga keltirilmoqda.