Navoiyda savdo majmuasida yong‘in chiqdi

O‘t o‘chiruvchilar yong‘inni 1 soatdan ko‘proq vaqtda o‘chirishgan. Hodisa oqibatida savdo majmuasining 200 metr kv maydoni ichki qismi hamda mahsulotlar yongan.

Foto: Videodan kadr

Karmana tumanida joylashgan “Toshkent parfum food” savdo majmuasida yong‘in sodir bo‘ldi. Navoiy viloyati hokimligi axborot xizmati hodisa yuzasidan rasmiy bayonot berdi.

Ma’lum qilinishicha, bugun, 6 may kuni soat 5:15 da 112 qisqa raqami orqali Karmana tumani FVB dispetcherlik xizmatiga tumanning Arg‘un mahallasida joylashgan savdo majmuasida yong‘in bo‘layotgani haqida xabar kelib tushgan. 7-qism yong‘in o‘chirish avtoekipaji voqea joyiga soat 5:18 da yetib borgan hamda yong‘in soat 6:24 da to‘liq bartaraf etilgan.

Hodisa oqibatida jabrlangan va halok bo‘lganlar yo‘qligi bildirildi. Yong‘inda savdo majmuaning 200 kv m maydoni ichki qismi hamda mahsulotlari yongan.

Yong‘inning kelib chiqish sababi o‘rganilmoqda.