O‘zbekistonlik jangarilar Suriyada Rossiya harbiy bazasiga hujum qildi – OAV

Rossiya harbiylari Suriyadagi aviabazada to‘rt nafar xudkush-terrorchining hujumini qaytardi. Bu haqda otishma lahzasi aks etgan videoni e’lon qilgan Mash xabar berdi.

Nashr ma’lumotlariga ko‘ra, hujum 20 may kuni erta tongda Xmeymim harbiy aviabazasi yaqinida sodir bo‘lgan. Jangarilar xavfsizlik postlari orqali harbiy obektga bostirib kirishga uringan, biroq rossiyaliklar ularga qarshilik qilgan.

Otishma oqibatida uch nafar jangari yo‘q qilingan, yana biri qochib ketgan. Unga tankka qarshi granata otish moslamasi (RPG) bilan zarba berilgan, ammo uning muvaffaqiyatli bo‘lgan-bo‘lmagani hozircha noma’lum.

Qayd qilinishicha, jangarilarning shaxsi allaqachon aniqlangan. Dastlabki ma’lumotlarga ko‘ra, ularning barchasi O‘zbekistondan kelgan va Suriyaning yangi hukumatini tan olmaydi.

Xmeymim havo bazasi Rossiya tomonidan foydalaniladigan Suriya havo bazasi va Rossiya harbiy kontingentining mamlakatdagi asosiy bazasi bo‘lib, u yerda Rossiya Aerokosmik kuchlarining aviatsiya guruhi joylashgan. Bazaning huquqiy maqomi Rossiya va Suriya o‘rtasida 2015 yil avgustida imzolangan kelishuv bilan tartibga solinadi.