Gvatemaladan mayyalarning salkam 3 ming yillik shahri xarobalari topildi

Arxeologlar Gvatemaladan mayyalarning qariyb 3 ming yillik qadimiy Los-Abuelos shahri xarobalarini topdi. Ushbu shahar marosimlar o‘tkaziladigan muhim shahar bo‘lgan, deb xabar beradi The Guardian.

Olimlar jamoasi Uaxaktun arxeologik yodgorligidan 21 kilometr uzoqlikda joylashgan El-Peten departamentidan qadimiy shahar xarobalarini topishga muvaffaq bo‘ldi. Los-Abuelos shahri nomi ispanchadan «Bobo va buvi» deb tarjima qilinadi. Qadimiy shahar maydoni 16 kilometr kvadratga teng.

Qayd etilishicha, shaharga miloddan avvalgi 800-500 yillarda, mayyalar sivilizatsiyasining klassik davridan oldin asos solingan. Ushbu madaniyat eramizdan salkam 2 ming yil oldin paydo bo‘lgan va milodiy IV-X asrlarga qadar zamonaviy Meksika, Gvatemala, Beliz, Salvador va Gonduras hududlarida gullab-yashnagan.

Gvatemala Madaniyat vazirligi Los-Abuelosni mayyalarning eng qadimiy diniy va marosim markazlaridan biri deb atadi.

«Ushbu hudud me’moriy rejalashtirishning ajoyib namunasi bo‘lib, u yerdagi piramida va yodgorliklar mintaqaga xos o‘yma naqshlar bilan bezatilgan», — deyiladi vazirlik xabarida.

Shuningdek, shahar yaqinidan balandligi 33 metrga yetadigan piramida, kanal tizimi aniqlangan. Ushbu topilmalar mayyalar sivilizatsiyada muhandislik mahorati yuqori darajada bo‘lganini ko‘rsatadi.