Гватемаладан майяларнинг салкам 3 минг йиллик шаҳри харобалари топилди

Археологлар Гватемаладан майяларнинг қарийб 3 минг йиллик қадимий Лос-Абуэлос шаҳри харобаларини топди. Ушбу шаҳар маросимлар ўтказиладиган муҳим шаҳар бўлган, деб хабар беради The Guardian.

Олимлар жамоаси Уахактун археологик ёдгорлигидан 21 километр узоқликда жойлашган Эл-Петен департаментидан қадимий шаҳар харобаларини топишга муваффақ бўлди. Лос-Абуэлос шаҳри номи испанчадан «Бобо ва буви» деб таржима қилинади. Қадимий шаҳар майдони 16 километр квадратга тенг.

Қайд этилишича, шаҳарга милоддан аввалги 800-500 йилларда, майялар цивилизациясининг классик давридан олдин асос солинган. Ушбу маданият эрамиздан салкам 2 минг йил олдин пайдо бўлган ва милодий IV-X асрларга қадар замонавий Мексика, Гватемала, Белиз, Салвадор ва Гондурас ҳудудларида гуллаб-яшнаган.

Гватемала Маданият вазирлиги Лос-Абуэлосни майяларнинг энг қадимий диний ва маросим марказларидан бири деб атади.

«Ушбу ҳудуд меъморий режалаштиришнинг ажойиб намунаси бўлиб, у ердаги пирамида ва ёдгорликлар минтақага хос ўйма нақшлар билан безатилган», — дейилади вазирлик хабарида.

Шунингдек, шаҳар яқинидан баландлиги 33 метрга етадиган пирамида, канал тизими аниқланган. Ушбу топилмалар майялар цивилизацияда муҳандислик маҳорати юқори даражада бўлганини кўрсатади.