Namanganda qalbaki valuta sotuvchilar qo‘lga olindi

Namangan viloyati “Kosonsoy tuman yo‘llardan foydalanish” unitar korxonasi ishchisi o‘zganing ishonchiga kirib, go‘yoki o‘zida qalbaki 20 ming AQSh dollari borligini va uni haqiqiy 14 ming AQSh dollariga sotishini aytadi.

Davlat xavfsizlik xizmati va Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda, unitar korxona ishchisi o‘zaro kelishuv doirasida xaridorga qalbaki 8 ming AQSh dollarini bergan vaqtida ashyoviy dalillar bilan ushlandi.

Shuningdek, u mazkur qalbaki xorijiy valutani Kosonsoy tumanida yashovchi shaxsdan olgani aniqlanib, ushbu fuqarodan ham yuqoridagi kelishuv doirasidagi soxta 6 ming AQSh dollari protsessual tartibda rasmiylashtirib olindi.

Tergovga qadar tekshiruv davomida yuqoridagi shaxs ushbu qalbaki valutalarni Kosonsoy tumanida istiqomat qiluvchi fuqarodan olganligi aniqlanib, u ham protsessual tartibda ushlandi.

Holat yuzasidan qonunbuzarlarga nisbatan Jinoyat kodeksining 176-moddasi 3-qismi “a” bandi bilan jinoyat ishi qo‘zg‘atilib, qamoq ehtiyot chorasi qo‘llandi.

Hozirda dastlabki tergov harakatlari olib borilmoqda.

Tayyorlagan: Отабек Матназаров

#Namangan viloyati #DXX #qalbaki valuta