Germaniyadan bir hafta ichida ikkinchi deportatsiya reysi uchib ketdi

Deportatsiya qilinishi kerak bo‘lgan 43 nafar iroqlik qochqin Leypsigdan Bag‘dodga olib kelindi. Buni operatsiyani nazorat qilgan Germaniya Ichki ishlar vazirligi va Tyuringiya federal yeri migratsiya vazirligi tasdiqladi. Flightradar ma’lumotlariga ko‘ra, samolyot Leypsigdan mahalliy vaqt bilan soat 10:52 da (Toshkent vaqti bilan 12:52) havoga ko‘tarilgan. U Iroq poytaxtiga to‘rt yarim soatdan keyin qo‘ndi.

Deportatsiya qilinganlarning barchasi erkaklar, ularning ba’zilari jinoyatlarda ayblangan, deya xabar beradi dpa agentligi. Ularni samolyotga politsiya mashinalarida olib kelishgan. Deportatsiya qilinganlarning 14 nafari avval Tyuringiyada yashagan, qolganlari yettita boshqa federal hududdan kelgan.

Bu Germaniyadan bir hafta ichida ikkinchi deportatsiya reysidir. 18 iyul kuni deportatsiya qilingan 81 nafar afg‘on bo‘lgan samolyot Leypsig/Halle aeroportidan Kobulga jo‘nab ketdi. Germaniya ichki ishlar vaziri Aleksandr Dobrindtning so‘zlariga ko‘ra, ular ham jinoiy javobgarlikka tortilgan.

Afg‘onistonga parvozni tayyorlashda Germaniyaning «strategik hamkorlari» ishtirok etgan, deya qo‘shimcha qildi Dobrindt va ulardan biri sifatida Qatarni tilga oldi. Bild nashriga bergan intervyusida vazir deportatsiyalar bo‘yicha «ko‘proq bosim», shuningdek, «uchinchi davlatlar bilan ko‘proq bitimlar tuzish va kontrabanda mantig‘idan voz kechishni» istashini aytdi.