Xivada «Qovun sayli» festivali o‘tkazildi

Xorazm viloyatining Xiva shahrida 8-10 avgust kunlari an’anaviy «Qovun sayli» festivali o‘tkazildi.

«Ichan-qal’a» tarixiy majmuasi va «Arda-Xiva» sayyohlik markazi hududida keng ko‘lamli tadbirlar bo‘lib o‘tdi. Mahalliy fermer xo‘jaliklari tomonidan qovunning ko‘plab navlari va ularni yetishtirish texnologiyalari namoyish etildi.

Tumanlar va yirik korxonalar o‘z stendlarida qishloq xo‘jaligi mahsulotlari, tovar va xizmatlar ko‘rgazmasini tashkil qildi. 

Festival mehmonlari degustatsiyadan tashqari, folklor jamoalarining chiqishlarini tomosha qildi, milliy taomlarni tayyorlash bo‘yicha mahorat darslari va xalq o‘yinlarida ishtirok etdi.

Festivalning faol ishtirokchilari turli nominatsiyalar bo‘yicha Xorazm viloyati hokimligi va homiylarning qimmatbaho sovg‘alari bilan taqdirlandi.

Taqdirlash marosimidan so‘ng mahalliy va xorijiy san’atkorlar ishtirokida gala-konsert bo‘lib o‘tdi.