Yangi Angren IES atrof-muhitni ifloslantirayotgani aniqlandi

Ekologiya boshqarmasi ifloslantiruvchi moddalarni tozalash samaradorligi yetarlicha bo‘lmagani sababli kompensatsiya hisob-kitob qilingani haqida xabar berdi.

Toshkent viloyati, Ohangaron tumanida joylashgan Yangi Angren IES tomonidan ifloslantiruvchi moddalar atmosfera havosiga tashlanayotgani aniqlandi. Bu haqda Toshkent viloyati Ekologiya boshqarmasi xabar berdi.

Qayd qilinishicha, Yangi Angren IES faoliyati davomida hosil bo‘lgan ifloslantiruvchi moddalar atmosfera havosiga tashlanayotgani yuzasidan tekshirish o‘tkazilgan.

«O‘tkazilgan tekshirish davomida jamiyatdagi mavjud chang-gaz tozalash uskunalarini ishlab chiqarishdan hosil bo‘lgan ifloslantiruvchi moddalarni tozalash samaradorligi yetarlicha bo‘lmaganligi sababli Vazirlar Mahkamasining 2021 yil 12 apreldagi 202-sonli qaroriga asosan kompensatsiya hisob-kitob qilinib, kamchiliklarni bartaraf etish yuzasidan ko‘rsatmalar berildi», deyiladi xabarda. Bunda kompensatsiya miqdori qancha bo‘lishi ma’lum qilinmadi.

Ta’kidlanishicha, ishlab chiqarishdan hosil bo‘lgan ifloslantiruvchi moddalarni atmosfera havosiga tashlanishini oldini olish hamda aholi turmushiga salbiy ta’sirini kamaytirish bo‘yicha «yo‘l xaritasi» ishlab chiqilgan.

Tayyorlagan: Сардор Юсупов

#Ohangaron #ekologiya #Yangi Angren IES