O‘zbekiston va Germaniya bariatrik jarrohlikda xalqaro standartlarni joriy etadi

"Germaniyaning Alexianer St. Martinus-Krankenhaus shifoxonasi va O‘zbekiston Respublika ixtisoslashtirilgan endokrinologiya ilmiy-amaliy tibbiyot markazi o‘rtasida bariatrik jarrohlik yo‘nalishini rivojlantirishga qaratilgan yangi xalqaro hamkorlik yo‘lga qo‘yildi", – deyilgan nashrda.

Dyusseldorfdagi semirish kasalliklarini davolash markazi mutaxassislari O‘zbekistonning yetakchi tibbiyot muassasasi bilan birgalikda semirish va metabolik kasalliklar jarrohligi sohasida tibbiy xizmatlar sifatini oshirish, ta’lim, ilmiy tadqiqotlar va klinik amaliyotlarni mustahkamlash bo‘yicha hamkorlik qiladi.

Mazkur kelishuv doirasida qo‘shma tadbirlar – qayta tayyorlash va malaka oshirish dasturlari, stajirovkalar, bilim va tajriba almashish, seminarlar, mahorat darslari, sohadagi yetakchi mutaxassislar ishtirokida xalqaro konferensiyalar tashkil etilishi, shuningdek, ekspertlar xulosalari asosida tibbiyotni rivojlantirish bo‘yicha tashabbuslarni amalga oshirish rejalashtirilgan.

Maqola yakunida, "Har ikki mamlakat tibbiy muassasasi xalqaro hamkorlik doirasida bariatrik jarrohlik sohasida yuqori professional standartlarni joriy etish va uni rivojlantirishga o‘z hissasini qo‘shadi", – deb yozilgan.