O‘zbekiston va Malayziya tadbirkor ayollarni qo‘llab-quvvatlashda hamkorlik qiladi

Muloqot davomida O‘zbekiston va Malayziya ayol tadbirkorlari o‘rtasidagi sheriklik aloqalarini rivojlantirish masalalari muhokama qilindi.

IWEM prezidenti Norazizax Borxan O‘zbekiston ayollarini tadbirkorlikka o‘qitish va amaliy ko‘nikmalarini yanada rivojlantirish maqsadida o‘zbek tomoni bilan hamkorlik qilishga yuqori qiziqish bildirdi.

U O‘zbekistonda tadbirkor ayollarning salohiyatini yanada oshirish dasturini birgalikda ishlab chiqishni taklif qildi. Ushbu dastur biznes ko‘nikmalarini rivojlantirish, raqamli tadbirkorlikni o‘zlashtirish, rahbarlik va muzokara olib borish qobiliyatlarini shakllantirish, o‘z brendini yaratish hamda xalqaro savdoga tayyorgarlik ko‘rish kabi vazifalarni qamrab oladi. 

Malayziya tomoni, shuningdek, O‘zbekistonda ayollar biznesi va tadbirkorligini rivojlantirish, O‘zbekiston-Malayziya qo‘shma sammitni o‘tkazish, ayol trenerlar va spikerlar almashinuvi dasturini yo‘lga qo‘yish, ayollarni tadbirkorlikka o‘qitish va rivojlanish markazini tashkil etish kabi tashabbuslarni ilgari surdi.

Muloqot davomida "ASeAN-Markaziy Osiyo o‘zgarishlar yaratuvchi ayollar mukofoti" kabi platforma yaratish xususida fikr almashildi.  

Ushbu tashabbuslar bilan batafsil tanishtirish va ularni amalga oshirish yo‘llarini muhokama qilish maqsadida shu yil sentabr oyida IWEM va Malayziya ta’lim provayderlari uyushmasi vakillari ishtirokida Kuala-Lumpur shahrida davra suhbatini o‘tkazishga kelishib olindi.