UzAuto Motors 8 ta yangi model chiqarishni rejalashtiryapti

UzAuto Motors yaqin kelajakda avtomobil bozoriga sakkizta yangi model chiqarishni rejalashtiryapti. Bu haqda kompaniya bosh direktori Yanosh Kovach «Sherzodxon Qudratxo‘ja bilan…» loyihasiga bergan intervyusida ma’lum qildi.

«O‘n besh yil oldin bu yerda ishlaganimda vaziyat butunlay boshqacha edi. Hozir bozor ancha diversifikatsiyalashgan. Xitoy va Koreya mashinalari kirib kelmoqda. Yangi brend va modellar paydo bo‘lyapti. Bu raqobat biz uchun qiyinchilik tug‘dirsa-da, xaridor uchun foydali», — dedi Kovach.

Shuningdek, UzAuto Motors bosh direktori ham ichki bozorda ham eksportda raqobat kuchayib borayotgani, elektromobillarga talab oshganini ta’kidlab o‘tdi.

«Raqobat nafaqat ichki bozorda, balki eksportda, masalan, Qozog‘iston, Ozarboyjon va boshqa mamlakatlarda ham kuchaygan. Har bir kompaniya xaridor uchun kurashmoqda. Shuning uchun biz ham strategiyamizni o‘zgartirishimiz, BYD, Kia, Hyundai, Haval kabi kompaniyalar bilan raqobatlashishga tayyor bo‘lishimiz kerak va bu biz uchun katta chaqiriqdir», — dedi u.

Kovachning qo‘shimcha qilishicha, UzAuto Motors yaqin yillarda o‘z modellari qatorida, ayniqsa, SUV segmentini kengaytirishni rejalashtiryapti.